Charter Document - 02520524

Wir Ludowig von gottes genaden Romischer kaiser ze allen ziten merer des richs enb[iete]n vnsern zolnern ze Ottingen vnd allen andern vnsern zolnern vnd mautteneren die ietz sint oder furbas werdent vberal in vnserm lande ze Bayern vnsern lieben getriwen vnser hulde vnd alles gut Wir wellen vnd gebiten ivch es och vesteclichen vnd ernstlichen was die gaistlichen lute der [] abte [] vnd daz conuente des gotzhuses ze Raitenhaselach vnser lieb demutige traides vnd wines daz in vf irem vrbor vnd aigen wachsset des si in irem closter vnd zv ir not bedurffent furent vf dem wazzer vnd vber lande daz ir si daz zol vnd mautfry furen lazzent vnd si darvmbe mit dhainen sachen nicht anraichent noch vordernt als lieb ivch vnser hulde sint Der brief ist geben ze Munchen des phintztages nach Vrbani in dem driv vnd drizzigstem jare vnsers richs vnd in dem zwaintzigstem des kaisertumes