Charter Document - 02520523

Ich bruder Heinr[ich] hofmeister dez ernwirdigen fursten ertzb[ischof] Ortolfs ze Salzburch legat dez stuls ze Rom ich Virich der Paizz richter in dem Hallein tun ze wizzen in disem brief offenbar allen den di in sehent lesen oder horent lesen daz ein chrieg waz zwischen bruder Niclas dez obernmaisters vnd bruder Otten des nidernmaisters in dem Hallein vmb ein schaftricht in dem obernperig der zudem nidernhof gehort Den chrieg liezzen si an vns gantzlich wie wir den berichten zwischen ir daz scholten sibaidenthalb stat haben vnd der obermaister het da zue vollen gewalt von dem ersamen herren hern Hartneiden dem tumbrobst vnd von dem capitel ze Salzburch vnd von abt Vir [ich] vnd der samenung ze Salmansweiler auch het der nidermaister vollen gewalt von abt Vlr[ich] vnd von der samenung ze Raitenhaslach Nu haben wir den chrieg zwischen in also bericht daz der obermaister sechzik chlafter in der gaistlicher herren land dez probstes vnd dez capitels von Perchthersgadem mit sinchwerchen auf der want ze der tenken hant sol versieden vnd verwurchen auf dez nidernhofs schaftricht in dem obernperig vnd sol zue denselben sinchwerchen durich dez nidernhofs schurf sein wazer fueren dem nidernhof an schaden dem sol er auch seins wazzers nicht nemen Ez sol auch der obermaister dev schaftricht vnd den schurf von der zeit vnd er anhebt ze wurchen helfen rusten vnd auf haben allen weiz mit sein selbs arbaitern vnd mit halbem Ion Vnd der nidermaister sol auch seinen halben tail der schaftricht vnd dez schurffs mit seinen arbaitern vnd mit halbem Ion auf haben Auch sol der nidermaister dev rechten want in demselben perig gantzlich ainnutzen vnd wurchen Wann auch der obermaister di obgenanten sechzich chlafter mit sinchwerichen vernuzet vnd verwurchet so schol er chain wersloch da machen vnd sol auch furbaz mit der schaftricht vnd mit demselben perig nicht mer haben ze schaffen vnd sol auch dev schaftricht vnd den schurf nicht mer helfen rusten Auch haben wir gesprochen ob ain hofmeister fur den andern fuer in den sechzich chlaftern da sol er rusten mit sein selbs arbaitern vnd Ion dem andern an schade Ez hat auch der nidermaister einen theil geworicht vnd versiecht sich der obermaister daz im derselb theil nutz sei den sol er versieden dem nidernmaister an schaden vnd sol auch den arbaitern daz Ion geben di emaln daran geworicht habent Der taiding sind zeug Chunr[at] der Sybrer Vlr[ich] von sand Veyt Vlr[ich] Spach Chunr[at] Nater Fridr[ich] Redrer Heinr[ich] auf der Mawer der Haymer Seybot Draschel Hein[rich] Chnauzzel Chunrad Walicher Vlrich der Mercher Vlrich Swertzer Chunr[at] von Durrenberch vnd Vlrich der Chlouogel Daz di taiding also stat vnd vnzebrochen zwischen in beleiben geben wir in disen brief versigelten mit vnser baider anhangenden insigeln vns selb an schaden dar vnder si sich habent verpunden allez daz stat ze haben waz an disem brief von vns verschiden vnd vertaidingt ist zwischen in Der brief ist geben don man zalt von Christes geburd dreuzehen hundert jar da nach in dem sechs vnd viertzgistem jar an sand Luceyn tag