Charter Document - 02520522

Ich bruder Fridreich ze den Zeiten hofmaister in dem Rotenhasleher hof ze Chrems vergich offenbar an disem brief allen den die in sehent oder hornt lesen daz ich Dimueten von Chennepach lazzen han ze rechtem leibgeding vnser wis die da gehaizzen ist in dem Pimse mit der mainung daz si vnserm gotshaus do von jerchleich die weil si lebt dienen schol ein chuffel salcz oder ein fuder weidechs an sand Mychhels tag vnd welichs jars si des nicht entet so schol dev selb wis vnserm gotshaus ledich vnd veruallen sein vnd schol si von allem irm recht gesten Auch ist mer ze merchen daz nach irm tod wenn si nicht mer lemtich ist die vorgenante wis in dem Pimse vns vnd vnserm oftgenanten gotshaus ze Rotenhaslach ledich vnd freis aygen ist an alle irrung vnd ansprach aller irr erben vnd freunt Vnd daz ir die red also stet vnd vnzebrochen beleih dar vber gib ich ir egenanter bruder Fridreich disen brief ze einem vrchund versigelten mit meinem insigel Der brief ist gegeben do ergangen von Christes gepurd warn dreutzehen hundert jar dar nach in dem sechs vnd viertzkistem jar an sand Katherein tag