Charter Document - 02520521

Ich Magens der alt Wulp vergich fur mich vnd fur mein hausfrawn vnd fur alle vnser eriben di wir haben vnd noch chvmftichleichen gewinnen vnd tun chunt offenbar mit disem brif allen den di in ansehent oder horent lesen daz ich mit verdachtem mut vnd mit meinem guten willen vnser vrawen vnd ir gotzhaus ze Rattenhaslach vnd meinem herren abt Vlr[eich] vnd seinem conuent da selben Ofnein di Engelbrecht hausfrawe von Albaren dev selb vraw meins vater herren Magensen des Wulppen waz vnd mein di selb egnant vrawe Ofnein mein egenanter vater dem vorgnanten gotzhaus geben hat fur aigen vnd swaz chvmftichleich von ir cham di heut lemptich sind vnd noch chvmftichleichen von dem geslacht choment es sein man oder weib daz selb wil ich egenanter Wulp mein hausfrawe vnd alle vnser eriben di wir haben vnd noch chumftichleichen gewinnen stat haben Vnd haben auch hintz dem vorgenanten geslecht waz von vrawen Ofnein chomen ist vnd noch chumftichleichen wirt nimmermer nicht ze sprechen weder nach ir leib noch nach ir gut vnd sind ledichleichen vnser vrawen ze Rattenhaslach vnd des vorgenanten ir gotzhaus Es ist auch ze merchen dev mul ze Schospach die lehen ist gewesen von meinem oft genanten vater vnd di daz oft genant gotzhaus lang mit nutz vnd mit gewerd inne gehabt habent vnd noch habent der selben lehenschaft verzeich ich mich fur mich vnd fur mein hausfrawn vnd fur alle vnser eriben di wir haben vnd noch chumftichleichen gewinnen Des sint taidinger gebesen her Vlr[eich] der Schillicher der preiol her Vlr[eich] der Oler der obernchellner ze Raitenhaslach H[ainreich] der alt En Jans der Purger Jans der Schillicher Ch[unrat] der Feuichtner H[ainreich] der Schonschuster vnd ander erberg leuit genuch Daz in daz alles stat vnd vntzebrochen von mir peleib vnd von meiner hausfrawn vnd von allen vnsern eriben also vor geschriben stet gib ich in disen offen prif versigeltten mit meinem aigen anhangvnden insigel Vnd ist daz geschehen do man zalt von Christes gepurt dreutzehen hvndert jar in dem sechs vnd virtzichkisten jar an dem lichtmizz tag