Charter Document - 02520520

Ich Gebhart der Pachaimer mein hausfraw vnd vnser paider erben dy wir haben oder noch gewinnen wir verjehen offenbar an disem brief vnd tun chund allen den dy in sehent oder horendt lesen daz wir vns gar vnd ganczleich verricht haben mit dem erbern herren abbt ze Raytenhaslach vnd mit aller sammung dez selben conuencz da selben vmb dy ansprach vnd chlag dy wir hincz in gehabt haben von dez Maulavzschen mul in dem Grassawertal Do haben wir vns mit in vmb verricht nach erberen laut rat vnd nach vnser frevndt rat also daz wir noch chain vnser eriben noch nachkomen furbaz nymmermer nichcz ze sprechen schullen haben hintz dem obgenanten abbt von Raytenh[aslach] noch hintz seinem goczhaus weder mit recht noch an recht War daz wir dar vmb hincz in icht sprachen mit recht oder an recht daz schol der obgenant abbt von Raytenhaslach vnd sein conuendt vnd goczhaus alles gehabt haben gein vns vnd wir alles verloren haben gein in an aller stat auf gaistleichen rechten vnd auf weltleichen gericht wo sy disen briff fur tragent Daz im dem obgenanten abbt von Raytenhaslach dem conuendt dem goczhaus daz also stat vnd vnzeprochen von vns allen vnd allen vnsern eriben vnd nachkomen beleib dar vber zw einem vrchund der warhait geben wir in disen vnsern offen briff versigelten mit Ekharcz von Hauchenstain anhangunden insigel der dw gewaltiger pfleger ze Maricharczstain in dem Grassawertal waz vnd der vns sein insigel durch vnser pet willen hat im vnd allen seinen erben an schaden wan wir du nicht aigner insigel heten vnd haben vns mit vnsern trevn verpunden vnder dez egenanten Ekharcz insigel allez daz war ze lassen vnd ze volfuren daz oben an dem briff geschriben stet Der taiding sind zeugen Fridreich der Schreiber richter ze Traunstain Heinr[eich] Froschel richter ze Halle Rudolf der Schikke Virich Chastner Fridrich von Perenhappen vnd ander erberg laut genueg Der brief ist geben an sand Gallen tag do von Christus gepurd ergangen waren tausent jar dreuhundert jar in dem funf vnd vierczigistem jar