Charter Document - 02520519

Wir Ludowig von gotes genaden Romischer keiser ze allen Zeiten merer des reiches enb[ie]tn vnsern mauttnern ze Burchausen vnd ze Schardingen die ietzo sind oder furbaz werdent vnser hulde vnd alles gut Wir wellen vnd gebiten iw vesticlichen bei vnsern hulden daz ir die gaistlichen lute [] den abbt vnd den conuent des gotzhus ze Raytenhaslach an der freyunge die si auf dem In vnd auf der Saltzach hin aw vnd widerwazzers habent nicht hindert noch irret vnd dheinerlay vorderunge noch mautt von in noch von irn guten vordert oder nemet vnd si auch bei der freyheit vnd gnaden beleiben lazzet nach der brief sag die si von vns vnd vnsern voruaren seligen dar vber habent des wellen wir mit nichtiu enberen Geben ze Muenchen an eritag nach der osterwochen in dem ainen vnd dreizzigisten jar vnsers reichs vnd in dem achtzehenden des keysertums