Charter Document - 02520517

Ich Margret von Ror ich Wullfinch von Golldekk Agnes mein hausfraw verjehen fur vns vnd all vnser erben vnd tun chunt offenbar mit dem brif allen den di in sechent oder horent lesen daz wir mit veraintem vnd wolbedachtem mut vnd gutleichem vnserm willen dem beschaiden manne Charlein dem jungen Velber purger ze Purchausen seiner hausfrawn vnd allen seinen erben cheufleich vnd redleichen ze chauffen gegeben haben vnser zwen hofe ze Hofschalichen in Halspacher pfarre vmb vier vnd zwaintzich pfunt Regenspurger pfenning der si vns schon gentzleichen verrichtt vnd gewert habent mit beraiten pfenning Vnd sullen si di selben hofe inne haben handeln vnd nizzen mit allen den rechten ze holtz ze uelde ze waide ze wazzer vnd gemainleichen mit allen den ern rechten baidiv chloinen vnd grozzen swi di genand sind di von den hofen bechoment vnd bechomen mugen besuchten vnd vnbesuchten vnd in aller der mazze als wir di hof vntz auf den tag hevt selben gehandelt genozzen vnd inne haben gehabt allso auzgenomenleichen chauffen wir di vorgenanten zwen hofe her wider von in von dem tag hevt daz ist von vnser frawn tag ze der lichtmesse vebere drew gantzew jar vnd auch in den selben drein jaren alle jar jerleichen an dem lichtmesse tag vmb di vorgenanten vier vnd zwaintzich pfunt Regenspurger pfenning di ie ze der vrist danne genge vnd geb sind vnd sullen si vns ie ze der vrist nicht versten si geben vns di vorgenanten zwen hoefe vmb di selben pfenning her wider ze chauffen vnd sullen auch ie ze der vrist di hoefe her wider von in chaeuffen mir vmb vnser aigenew hab daz wir dar vmb weder in gehaime noch offenleichen di hof gein ander niemant anderswo verchumern noch verchauffen sullen noch enmugen Wir haben in auch di vorgenanten hof auf gegeben mit dez herren handen da von wir si ze lechen haben gehabt vnd sullen der auch ir gewern sein als lechens recht ist Teten wir dez nicht swittann schaden si dar inne nement wie der genant wer den ir ains bey seinen triwen mag gesprechen den sullen wir in ab tun gar vnd gantz vnbered vnd vnberecht iren Worten ze gelauben an aide vnd an allen iren schaden vnd sullen den datz vns vnd datz aller vnser habe haben Chauften wir aber di vorgenanten zwen hof von in her wider nicht in den vorgenanten drein jaren alle jar jerleichen ie an dem lichtmesse tag als oben verschriben ist schuellen wir vnd auch si vns baidenthalben zwen gemain man di purger ze Purchausen sind dar nach nemen vnd swaz vns di her zue haizzent geben daz sullen wir baidenthalben vergut haben vnd da bey beleiben triwleichen an gever vnd sullen auch da wider nichtes nicht reden Vnd sullen wir vnd all vnser erben vnd nachomen hintz in allen seinen erben vnd nachomen vnd auch hintz den vorgenanten hofen ewichleichen dhain ansprach nimmermer haben noch gewinnen vnd sullen auch di inne haben als ander ir gechauftew aigenew hab vnd lechen Wir versprechen vnd gehaizzen in auch mit disem brif vnd mit vnsern triwen in aydes weiz also stat ze haben vnd war ze lazzen an alle arig liste allez daz verschriben wirt an disem brif vergazzen wir vns aber indert gein in dar inne vnd in mit dhainen sachen indert vbergriffen der gelubde vnd punde als wir in di oben an dem brif versprochen haben daz wer an recht oder mit rechtten baidew gaistleichem oder wertleichem daz sullen si in allen leuffen vnd wegen allzeit behabt haben vnd wir verloren Swer auch disen brif inne hat von iren wegen dem selben oder den selben sein wir allez dez sulldig vnd gepuonden daz oben ist verschriben Daz in daz allez stet gantz vnd vntzebrochen beleih dar vber ze einem vrchunde der warhaid geben wir in disem brief mit meinem Margreten von Ror vnd mit meinem Wullfinch von Golldekk anhangunden insigeln versigelten dar vnder sich mein hausfraw Agnes all vnser erben vnd nachomen sich verbindent mit iren triwen allez daz stat ze haben vnd ze uolfuren daz oben ist verschriben Daz ist geschehen don man zalt von Ghristes gepurtt drewtzehen hundert jar dar nach in dem fumfe vnd viertzigistem jar an vnser frawn tag ze der lichtmesse