Charter Document - 02520516

Ich Ott Gotschleins des Schreiber sun von Chemnaten vnd mein hausfrawn Gedraut verjechen offenbar an disem brief allen den die in sehent oder hornt lesen das wir an die ersamen herren abbt Vlreichen vnd die sammung ze Raitenhaslach geworfen haben das si vns ires gotzhauses hub datz Vbrakchen die Chunrad der Abbt emalen von in gehabt hat lassen habent ze pawrecht besucht vnd vnbesucht zu vnser zwain leiben vnd nicht vnser erben vnd dar zu zwai zehent haws auch datz Vbrackchen mit der beschaidenhait das wir vnd in vnd irem gotzhaws dienen sullen von der egenanten hub vnd von dem zehent alle jar an sand Michelstag oder dar nach inner vierzehen tagen ain pfunt Salczburger pfening Auch sullen wir die vorgenanten zwen leib das oben geschriben gut pauleich vnd wesenleich legen mit zimmer vnd mit paw ze allen zeitten Vnd was wir dar an legen das sol nach vnserm tode an alle widercherumb bey dem gut beleiben Auch sol vnser der oft genanten zwayer leib alle jar ainer in ir Stift chomen wanne si mit ires gotzhauses lauten die in dem Weilhart gesessen sind stiftent vnd sol in fumf pfening Salczburger ze erumb pringen vnd sullen in dew hantuest die wir vber dew obengeschriben recht von in haben offenleich ze lesen geben vnd sullen si vns die zehant wider geben Wir sullen auch die offt genanten zwen leib vnsrew recht die wir auf der obengenanten hub nach diser hantuest haben chainnenweis nicht versetzzen oder verchauffen noch verchumeren in chain andrew gewald in ir gunst vnd willen Vnd wo wir der obengeschriben pundt vnd tayding aines oder zway oder mer uberfueren vnd nicht volfurten als oben ist geschriben so sein wir zehant geaullen von allen den rechten vnd genaden die wir auf der oft genanten hub datz Vbrakchen nach diser hantuest gehabt haben Vnd nach vnser der offt genant zwayer leib tode so ist aber zehant die oben geschriben hub in vnd irem gotzhaws ganczleich ledig waren mit allen rechten vnd nutzen ze welicher zeit es an dem jar ist Es sol auch vns den oft genanten zwain leiben vnd in diser brief erst frumen vnd chraft haben nach Chunrates des oben geschriben Abbtz tode wann er selb bey iem lebentigen dew selben hub niessen sol vnd inne haben Vnd das in vnd vns das also stat vnd vnuechert beleihe geben wir in disen brief ze vrchund versigelten mit der erbern manne Eberhartes des Chalbes vnd Fridreich von Inspruk anhangunden insigelen die si daran gelegt habent nach vnser pet in bayden an schaden Der brief ist geben do man zalt von Christi gepurd drewzehen hundert jar dar nach in dem vier vnd viertzigistem jar an sand Thomans tag von weinachten