Charter Document - 02520515

Ich Jacob Pfenwert puriger in dem Hellein Chunrat vnd Jacob mein paide sun vnd alli vnser erben vergehen offenbar an disem brief allen den di in sehent oder horent lesen daz wir mit gueter bidachtnvss vnd nach vnser nechsten friunt rat mit guetem willen auf gegeben hawen dem ersamen abbt Vlreichen vnd der sammvnge des gotshauss ze Raitenhaslach alliv recht diu wir gehabt hawen auf dem Tiufenpach der auch genant ist der Veuchtenpach vnd auf dem walde der ze paiden seitten dar auf stet als diu regenwazzer sagent won wir si nicht mochten volfueren als verschaiden vnd verschriben was zwischen vnser vnd des egenanten gotshauss ze Raitenhaslach vnd des nidernhofs in dem Hellein Vnd hawen vns derselben obengenanten reehtt gentzlich verzigen also daz der obengenant abbt Vlrich vnd diu sammvnge des gotshauss ze Raitenhaslach vnd ewichleich alliv ir nachchumft den obengenanten pach vnd den walt mvgen genvtzen vnd gewurichen zue irm hof in dem Hellein wie si wellent an alli vnser irrvm vnd Widerrede Der sachche vnd der verzeichnvss sind ziuge Vlrich der Paizz richter in dem Hellein Seibot sein bruder Hinr[ich] der Oberholtzer Chvnr[at] der Tenke Fridreich der Pueb Chvnr[at] der Pirler Ott der Oder vnd ander getriu leut genveg Vnd daz dem offtgenantem gotshaus ze Raitenhaslach vnd dem nidernhof in dem Hellein daz also stet vnd vnverchert bileib von vns vnd von allen vnsern erben geben wir in disen brief ze vrchunde der warhait versigelten mit Vlreichs des Paizzen ze den zeiten richters in dem Hellein insigel der daz nach vnserr gebet daran gelegt hat won wir selber aigens insigels nicht heten ime selber an allen schaden vnder dem wir vns mit vnsern trivn gentzleich verpinden stet ze hawen allez daz daz oben ist verschriben Daz ist geschehen nach Christes gepurtt vber driuzehen hundert jar in dem fiervndfierzigistem jar darnach an vnser fraven tage als si ward geporen