Charter Document - 02520514

Ich Ludweig von Mullohen vnd mein sun Vlreich Wernhart Eberhart Vlreich Ludweig vnd Hainreich verjehen offenbar an disem brief fur vns vnd fur alle vnser erben allen den die in sehent oder hornt lesen das wir vns mit gutem willen verzigen haben vnd verzeichen ledichleich vnd ganczleich aller der ansprach vnd chlag die wir gehabt haben hintz dem erbern vnd geistleichen herren von Raitenhaslach gut ze Laubenpach wie die genant ist gewesen auf wismat zewen vnd graben da sein wir von gestanden gar vnd ganczleich allenweis also das wir noch chain vnser erbe furbas nimmermer chain ansprach sullen dar auf haben oder gewinnen Vnd geben in dar vber ze vrchund disen brief an den nach vnser grosser gepet her Seifrid ze den zeiten pfarrer datz sand Jorigen sein insigelen gelegt hat iem an schaden vnd verpinden wir vns dar vnder mit vnsern trewn stat ze haben alles das oben verschriben ist Des sind zeug bruder Hainreich von Halle munich ze Raitenhaslach Walther des obgenanten her Seifrids des pfarrer von sand Jorigen chnecht Ott von Lawbenpach Chunrad der Prunnrern Nicka von Holczhaim Vlreich von Aw vnd ander pider lawt genueg Der brief ist geben nach Christes gepurd vber drewzehen hundert jar darnach in dem vier vnd viertzigistem jar andern freytag in der oster wochen