Charter Document - 02520513

Ich Wernhart der Visler vnd mein hausfrawe Agnes verjehen offenbar an disem brief allen den di in sehent oder hornt lesen daz vns der wirdig abbt Vlr[eich] vnd di sammung ze Raitenhaslach habent lazzen ir aygen gut ze Stainpuhel ze pawmans recht vnd alles daz dar zv gehort besucht vnd vnbesucht zv vnser bayder leiben vnd nicht lenger vnd sullen auch in da von di weil wir baydew leben weder stewer noch dienst geben Wir sullen auch irer vischswaid di si ze Mosuogel habent ir pfleger sein zv vnser bayder leiben vnd swenn wir baydew nicht mer sein so sol dhain vnser eribe nach dem genanten gut ze Stainpuhel oder nach der vis chswayd dhain red oder ansprach nicht mer haben wan ez dem genantem gotshaus danne leydich vnd vrey ist sam ander ir vreyes aygen Ez sol auch daz genantt gut ze Stainpuchel nach vnserm tod dem gotshaus geantwrt werden daz es stiftleich vnd pewleich lig ze haus vnd ze veld Dar vber gib ich genanter Wernhart Visler dem gotshaus ze Raitenhaslach disen brief ze vrchund mit meinem anhangendem insigel Der ist geben nach Christes geburrt vber dreutzzehen hundert jar dar nach in dem drev vnd viertzzigistem jar an sand Marteins abent