Charter Document - 02520512

Ich Ruprecht der Imtzinger vergich vnd tun chunt an disem brief fur mich vnd fur alle mein erben vnd nachchomen daz ich mich mit gutem willen vnd wolbedachtem mut redleich vnd rechtleich verricht vnd veraint han mit dem ersamen herren abbt Vlreichen vnd mit dem conuentt dez gotshauses ze Raitenhaslach vnd mit allen iren lewten vmb alle di schuld vnd ansprach vnd aufleuff swie sich di ergangen haben vnd wie di genant sint gewesen mit recht oder an recht swaz ich hintz in ze sprechen het vntz auf disen heutigen tag nach der erbern herren rat hern Frid[reichen] von Torring vnd seines svns hern Seyfrides vnd meines vettern Perchtolts dez Imtzinger vnd der erbern purger von Purchausen Frid[reichen] von Insprukk vnd Perichtolts dez Zinkken mit der beschaidenhait daz mir der ersame abbt vnd sein conuentt di oben genant sind gebent zway vnd dreizzig pfunt Saltzburger pfenning fur alle di schuld vnd ansprach als oben geschriben ist vnd habent auch mich der selben pfenning redleich vnd rechtleich gewert vnd verricht gantzz vnd gar vnd sol auch ich vorgenanter Ruprecht noch dhain mein erbe oder nachchomen furbaz dhain ansprach nicht mer haben hintz dem ersamen obengenanten abbt vnd hintz seinem gotshaus noch hintz ir lewten vnd gut weder mit gaistleichem rechten noch mit werltleichem vmb alle di schuld vnd ansprach die sich ergangen habent vntz auf disen heutigen tag Ich vergich auch mer daz mir der oben genant abbt vnd sein conuentt dhainer ablegung noch behuldigung gein der herscheft noch gein dem gericht noch hintz lant noch hintz lewten nicht gebunden noch schuldig sind Dar vber ze vrchund vnd ze einer gantzzen stetigung gib ich vorgenanter Ruprecht dem genantem abbt vnd dem gotshaus ze Raitenhaslach disen brief mit meinem anhangendem insigel vnd ze einer merern sicherait mit der erbern herren insigeln herm Frid[reichen] von Torring vnd seines svns herm Seyfrides Perichtols meines vettern dez Imtzinger vnd der erbern purger von Purchausen Frid[reichen] von Insprukk vnd Perchtolts des Zinkken insigeln di si dar an gelegt habent durch meiner gebet willen in an allen schaden wand si der vorgeschriben sache vertaidinger vnd verrichter gewesen sind zwischen dez genanten abbts vnd dez conuents ze Raitenhaslach vnd mein vnd verpind auch mich mit meinen triwen vnder dew insigel an alles gever allez daz stet ze haben daz oben verschriben ist Der brief ist gegeben nach Christes geburtt vber dreutzehen hundert jar dar nach in dem drew vnd viertzigistem jar an der ainlef tausent mayd tag