Charter Document - 02520511

Ich Chunrat der Pueb mein hausfraue vnd Fridreich vnd Christan mein paid sun vnd all ander vnser paider erben vergehen offenbar an disem brief allen den di in sehent oder horent lesen daz wir datz Hinterse auf den welden in dem Triufenpach vnd in dem Veuchtenpach vnd auf den selben zwain pechchen chainerlai holtzrecht oder bisteholtzrecht oder aigenschaft hawen oder gehabt hawen vnd verhaizzen bei vnsern triun swem Jacob Pfenwert seinev recht deu er auf den obengenanten welden vnd pechchen hat ze chauffen geit vnd di pfleger in dem nidernhof in dem Hellein ob si diu selben recht von ime werifent vnd chauffent von vns vnd von aller vnserr nachchumft ewichleich vnangesprochen sullen sein Vnd dar vmme geben wir dem vorgenanten Jacoben Pfenwert vnd den pflegern in dem nidernhof zu dem Hellein disen vnsern offenn brief ze vrchunde versigelten mit meinem des obengenanten Pueben insigel vnder dem wir vns gentzleich verbinden Des sind ziuge Ylr[eich] der Gaeugel Chunrat der Tenkke Chunrat der Pirler Ott der Oeder puriger in dem Hellein vnd ander getrive leut genuege Der brief ist gegeben nach Christes geburtt vber driuzehen hundert jar in dem driuvndfierzigisten jar darnach an sand Michels tage