Charter Document - 02520510

Ich Hainreich von Radekke vergich offenbar an disem brief fur mich vnd alli mein erben allen den di in sehent oder horent lesen daz ich mit wolverdachtem muet vnd nach meiner besten friunt rat den gaistlichen hern abbt Vlrichen vnd der sammvnge ze Raitenhaslach einen weiten vnd volligen wagenwech durich diu auge bei dem Hellein den si von Vlrichen dem alten Spechen ettwann puriger in dem Hellein vnd von seinen erben gechaufftt heten auz einem guet daz si ze rechtem lehen von mir heten vnd des si darnach siben jar in nutz vnd gewer gesezzen woren gegeben vnd geaigent han ledichleich vnd freileich fur rechtt aigen due ich daz wol getun mochtt won mir derselbe wogenwech ledich was woren vnd ich in mit dem guet von dem er was genomen anderstunde nicht het verlihen Vnde sullen auch di obengenanten hern von Raitenhaslach den selben offtgenanten wagenwech arbaiten vnd nvtzen zue irm hof in dem Hellein vnd zue den zwain lehenn diu gehaizzen sind Dornave vnd gelegen sind bei Prunninge oder swer diu selben zwai lehen inne hat bei tage vnd bei nacht swann si des bidurfent Vnd sol auch der obengeschriben wagenwech biwort vnd beslozzen all zeit sein mit zwain toren vnd sullen auch si diu selber inne hawen won niemant anders gesuech dar durich hat nur si selber Auch verhaizze ich fur mich vnd fur alli mein erben daz wir der egenanten hern vnd des gotshauss von Raitenhaslach des offttgenanten wagenweges da er in emalen auz gezaiget ist vnd als si in hiut in nvtz vnde gewer mit zwain toren inne hawent gwern sullen sein vnd richtich machen ob si dar vmme an wurden gesprochen an aller stat swo in des not geschieht alls eigens recht ist Vnd daz in vnd irm gotshaus ze Raitenhaslach daz also stet vnd vnuerchert bileibe von mir vnd von meinen erben vnd von aller vnser nachchumft gib ich in disen offenn brief ze vrchunde der worhait versigelten mit meinem anhangendem insigel Des sind ziuge her Chunr[at] der Velber Vlrich der Wulppe statrichter ze Saltzburch Peter Cheutzilk puriger ze Saltzburch Ortlieb der Prenner Vlr[ich] der Paizze richter in dem Hellein Vlrich der Spech Janns der Leittner baide puriger in dem Hellein Hertel der Holtzoppfel vnd ander getriu leut genuege Daz ist geschehen nach Christes gepurrt vber driuzehen hundert jar in dem driu vnd fierzigistem jar darnach an sande Margreten tache