Charter Document - 02520509

Ich Eberhart hern Eberhartz des Chramer eninchel von Chrems vergich vnd tvn chvnt alln den die disen brief lesent oder horent lesen daz ich mit wolverdachtem mvt zv der zeit do ich iz wol getvn machtt dem beschaiden mann Rapoten hern Mathes svn von Vruar vnd vern Chlaren seiner hausvrowen vnd iren erben rechtt vnd redleich verchoufft vnd gegebn han meinen Weingarten gelegn auf der haid des fvmf jeuch sind vmb ir varunt gut des ich gar vnd gentzleich gewert pin Ich han auch in den selbn Weingarten auf gegebn mit perchmaisters hant Cholmans di zeit hofmaister in Melcher hof ze Radendorf da von man dient in den selben hof fvmf vnd sibnczk pfenning ze purchrecht alle jar an sand Cholmans tag vnd dient man auch da von ze rechtem dienst ein pfvnt pfenning an sand Cholmans tag Perchthersgadmern hintz der eysnein tuer Den vor gnanten Weingarten han ich gegebn dem vorgnanten Rapoten vnd seiner hausvrowen vnd iren erben ledichleich vnd vnverchvmbert mit alln den rechten sam ich den selb mit nutz vnd mit purchrechtes gewer herpracht vnd gehabt han ze versetzen vnd ze verchouffen alln iren frvm da mit ze schaffen wie in daz aller pestt chvmt Vnd pin auch dez ir rechter scherm vnd gewer fur all ansprach als purchrechtz scherms recht ist in dem land ze Ostereich Vnd wigetanen schaden si dez dor vber nemen den mir ir ains pei seinen trewen gesagen mag den lube ich in gentzliech ab ze legen mit meinen trewen vnd gib in dez zv einem sichern vrchund disen brief versigeltn mit meinem insigel Dar zue sind zeug der sache mit iren insigeln di erbern mann der vorgnant Cholman vnd her Chvnrat der Stozzel di zeit sluzzler ze Chrems vnd her Jans hern Seidleins svn von Mautaren Der brief ist gebn nach drevtzechn hvndert jaren von Christi gepurd in dem drev vnd viertzkistm jar ze ostern