Charter Document - 02520508

Ich Wernhart Wolfoltinger purger ze Muldorf vnd mein hausfrawe vnd alle vnser erben verjechen vnd tun chunt offenbar mit disem brief allen den di in ansehent horent oder lesent das wir vns mit vnserm herren abbt Vireichen von Raitenhaslach vnd mit seinem conuent liebleich vnd frewntleich verricht haben nach vnser frewnt rat vmb allen den chrieg den wir heten gein in vmb vnser gut ze Achaim das gelegen ist an ir gut auch ze Achaim ze holcz vnd ze veld vnd ze wismat also mit der beschaiden also es ze der selben zeit mit taiding dar ist chomen vnd mit marich aus gestossen ist da erberig lawt bey sind gewesen das wir furbas uber die selben marich in ir gut nicht greiffen sullen weder ze holcz noch ze veld vnd ze wismat Dar vmb habent si vns geben newn Schilling Salczburger pfenning Des ist taidinger gewesen Fridreich der Perchouer Hainreich der Chnuchaimer Jans der Puriger Chunrad der Newnmaister Das das wor sei vnd vnzebrochen beleih geben wir in disen offen brief versigelten mit vnsers aidem Fridreich des Perchouer vnd Jansen des Puriger aigen anhangunden insigel die es dar an gelait habent durich vnser pet willen in an allen schaden dar vnder wir vnd mit vnsern trewn verpinden alles das ze uolfueren vnd oben geschriben stat Das ist geschechen do man zalt von Christes gepurd drewzehen hundert jar in dem drei vnd viertzigistem jar des nachsten mitichens nach mitter vasten