Charter Document - 02520507

Ich Wulfinch von Goldekk vergich offenbar an disem briff fur mich vnd fur mein hausfrawn vnd fur all mein erben daz ich durch meiner sel willen vnd aller meiner voruodern dem goczhaus ze Raytenhaslach vnd der sammung da selben gegeben han ze rechtem selgret meinew drew gut in der Castein dy gehaissen sind Im graben Praitenperch vnd In der lakchen daz sy dy ewichleich haben sullen fur freyz vnd ledigs aigen besucht vnd vnbesucht mit dienst vnd mit stift vnd mit allen den nuczen dy da von mugen chomen Vnd han auch sy der gut in nucz vnd in gewer geseczt bey mir lebentigen do ich daz wol getan mocht mit der beschaidenchait daz dy obgenanten herren von Raytenhaslach alle jar ewichleich meinen jartag sullen begen an dem tag alz got vber mich gebutt oder dar nach inner acht tagen wann sy dez aller besst weil vnd muzz haben Vnd an dem selben tag sol man der sammung einen dienst geben iesleichem ein trinkchen welschs weins vnd ein weysses brott vnd czway stukch gesulczter visch Si sullen auch an dem vorgeschriben meinem jartag dez abencz gemainchleich vigily singen vnd an margen gemainchkleich messe vnd sol mein dannoch wesunderleich gedacht weren in irem capitl vnd sol da besunders gebet vmb mein sei auf geseczt werden War aber dez got nicht welle daz dy obgeschriben herren von Raytenhaslach dy ob genanten pund vber furen vnd mein jartag vnd den dienst allenweis nicht volfurten alz oben ist verschriben dez selben jares wye offt vnd wye dikche daz geschach sol der dienst vnd dy nuecze von den obengenanten guten gehoren in daz spital ze Salczburch gar vnd ganczleich vnd sol daz den offt genanten heren vnd dem goczhaus ze Raytenhaslach andre jar in den si dy obengenanten vnd verschribenew taiding ganczleich volfurten an schaden sein vnd allen iren rechten Vnd daz in vnd auch mir daz also stat vnd vnuerricht beleihe von mir vnd von allen meinen erben gib ich in disen briff ze vrkund der warhait versigelten mit meinem insigl vnd mit meines suns herren Wulfinges insigl Daz ist geschehen nach Christus gepurd vber drewczehen hundert jar in dem drew vnd vierczigistem jar dar nach an vnser frawn tag ze der chundum in der vasten