Charter Document - 02520506

Ich Haug der forstar von Gunthering vergich fur mich mein hawsfrawnn vnd all vnser erben die wir yeczunt haben oder furbas gewinnen offenbar an disem brief allen den die in sehent oder hornt lesen vmb die ansprach die ich hintz der erberen frawnn Jauten der Hallerinn purgerin ze Purchawsen gehabt han vmb das gut das Dorffen haisset das gelegen ist in Ottinger gericht Sag ich sey der selben ansprach gar vnd gancz ledig mit disem brief das si iren frwm mit dem gut schaffen sol es sey mit verchauffen oder mit versetzzen oder wer es von ir werben wil der sol auch mit ron sein Vnd sol auch ich noch dhain mein erib auf das vorgenant gut dhain ansprach nicht mer haben noch gewinnen weder mit gaistleichem noch weltleichen rechten Das ir das stat gancz vnd vnzebrochen beleih dar vber ze einem vrchunde vnd ze einer statikait gib ich ir disen brief versigelten mit meinem insigel Der brief ist geben do man zalt von Christes gepurd drewzehen hundert jar darnach in dem dreyn vnd vierczigisten jar an dem achten tag nach dem pericht tag