Charter Document - 02520504
Charter Number: | 02520504 |
---|---|
Cartulary Title: | Die Urkunden des Klosters Raitenhaslach : 1034-1350 |
Charter Language: | German |
Charter Origin: | Lay |
Charter Type(s): | Surrender |
Date: | 1342 |
Date type: | Internal, A.D., Feast |
Resource Link(s): |
Monasterium.net |
Charter:
Ich Seyfrid der Smid burger ze Purchawsen mein hausfrawn vnd alle vnser erben verjehen an disem brief offenbar vnd tun chuent allen den die in sehent oder horent lesen die nu lebent vnd her nach chunftig sind das wir ein chlag vnd ein ansprach heten hintz abbt Vlreichen vnd dem gotzhaws ze Raitenhaslach vmb ein leibgeding auf der mul datz Aw dew gelegen ist vnder Sandmareinperig Von der chlag vnd von der ansprach sein wir gestanden gar vnd gantzleich alienweis an alles geuar also das wir ledig sagen vnd lassen den genanten abbt vnd das gotzhaws ze Raitenhaslach das wir noch chain vnser erbe oder frewnt furbas nimmer chain ansprach oder chlag vmb die sache gehabe sullen Des sind zeug bruder Jacob vnd der vnder chelner her Hainreich von Halle bayd munich ze Raitenhaslach Berchtold der Zinck Fridreich der Zinck ze den selben zeitten richter ze Purchawsen Fridreich von Inspruckch Wernher von Talweg Hainreich der Lendel Ott der amptman Ott der zaler Chunrad der eider all purger ze Purchawsen vnd ander pider lawt genueg Vnd wand ich obgenanter Seyfrid vnd mein erben aigens insigelen nicht haben haben wir geworfen mit phleg vnd mit gebet des erbern mannes hern Ortneitzs des Tuntzen der ze den zeiten richter ze Otting was vnd Fridreich des Zincken der auch ze den zeitten richter ze Purchawsen was insigelen an disen brief ze einem ewigen vrchund die dar an hangent in bayden an schaden dar vnder wir vns verpinden mit vnsern trewn stet vnd vnuerchert ze behalten alles das das von der obgenanter sache verschriben ist Der brief ist geben da von Christes gepurd vergangen worden drewzehen hundert jar dar nach in dem zwain vnd viertzigistem jar des pfintztags nach dem prechen tag