Charter Document - 02520503
| Charter Number: | 02520503 |
|---|---|
| Cartulary Title: | Die Urkunden des Klosters Raitenhaslach : 1034-1350 |
| Charter Language: | German |
| Charter Origin: | Lay |
| Charter Type(s): | Promise |
| Date: | 1341 |
| Date type: | Internal, Feast |
| Resource Link(s): |
Monasterium.net |
Charter:
Wir Witig der Haidinger vnd Chvnr[at] der Rosenhaimer verjehen vnd tun chunt an disem brief allen den di in hornt oder sehent lesen daz wir ein ansprach heten hintz dem gotshaus ze Raitenhaslach daz man vns alle jar geben solt einen ainvarben rokeh von einen gutlein daz haizzt Lengenmos daz vnser vorvodern dem genantem gotshaus ze selgret geschaft habent Nv sein wir beweiset von vnsern guten freunten daz wir der ansprach dhain recht gehabt haben vnd da von sein wir da von gestanden vnd haben vns verzigen gar vnd gentzleich an alles geverd der selben ansprach also daz wir vnd alle vnser erben vreunt vnd nachchomen nimmermer sullen an daz obengenant gotshaus vmb di ansprach dhain suchen sullen gehaben weder mit worten noch mit werchen vnd sol daz oftgenant gotshaus ze Raitenhaslach vnd di herren da selben von vns ewichleichen ledich vnd vnangesprochen sein Daz in daz stet vnd vnverchert beleih geben wir in disen brief diser sache ze einem ewigem vrchund versigelten mit des erbern mannes insigel Chvnr[aten] des Awer von Trawnstain daz dar an hanget im an schaden wan wir selben aigens insigels nicht heten Der brief ist geben millesimo CCCXLI an sand Mauritzen tag