Charter Document - 02520499

Ich Eberhart Eberharts sun ettwann pflegers ze Liechtenstain vergich offenbar an disem brief allen den di in horent lesen vnd vernement daz ich nach meins lieben vnd obengenanten vaters lesten geschefftt dem got genade vnd nach meiner nechsten vnd besten friunt rat den gaistleichen heren dem abbt Vlreichen vnd der sammunge ze Raitenhaslach grabes ordens ledich han lazzen zwen weingorten bei Engelschalichstorf di si nennent den Schreiber vnd den Pleuer gar vnd gentzlichen vnd aller der recht diu ich zue meinem leib dar auf het mich han verzigen vnd han auch den selben hern von Raitenhaslach diu hantfestt wider gegeben diu ich dar vber von in inne het vnd sol ich noch chain mein friunt noch mein erben dar auf nimmermer chain ansprach gewinnen Vnd daz in daz also stet vnd vnuerchert bileib von mir vnd von meinen friunten vnd von allen meinen erben gib ich den obengenanten hern vnd dem gotshaus ze Raitenhaslach disen brief ze vrchunde der warhait versigelten mit des erwergen manns hern Jacobs von Eslorn purigers ze Wienn anhangenden insigel der ze den zeiten von meines obengenanten vater wegen vnde geschefftt mein vnd meiner hab pfleger was mit voelligem gewalt vnder dem ich mich gentzlich verpint mit sampt meinen friunten vnd erben stet ze haben alz daz obengeschriben ist mit allen triuen Daz ist geschehen due man zalt von Christes gepuertt driuzehen hundert jar in dem ainz vnd vierzigistem jar dar nach an sande Gorigen tage