Charter Document - 02520497

Ich Ekkhart von Tann hern Niclaus sun dem got genade vnd mein hausfrav frav Wandel vnd vnser paider erben verjehen offenbar an disem brief allen den di in sehent oder horent lesen daz wir mit guter verdachtnuss vnd mit guetem willen nach vnserr friunt rat gegeben hawen vnser guet daz gehaizzen ist Ode vnd ist gelegen in Titmaninger gericht daz vnser rechtz vnd freyz eigen was den ersamen vnd gaistlichen hern abbt Vlrichen vnd der sammunge ze Raitenhaslach vnd irm gotshaus bisuecht vnd vnbisuechtt mit allen den rechten vnd nvtz vnd gewer als wir iz selber vnd vnser vordem inne gehabt hawen vnd hawent si vns dar vmme gegeben vnd in geantwurtt mit volliger nvtz vnd gewer einen hof vnd ein mul div da zue gehort ze Sighartinge Wir verzeichen vns auch des vorgenanten guetes datz Ode daz wir noch chain vnser erbe furbaz chain wortt oder ansprach dar nach hawen sullen avch verhaizzen wir daz wir des obengenanten guetes datz Ode der vorgeschribenn hern vnd des gotshauss von Raitenhaslach gewer sullen sein swo in sein not geschieht vnd swann si daz an vns vodernt als lange als eigens recht ist vnd als daz lantrecht stet in dem gerichtt da iz inne gelegen ist Wer awer daz wir dar an saumich wem vnd ir gewer nicht weren swelichen schaden si vnd ir gotshaus des nemen den ein ir amptman an ir stat mit seinem ayde mage bisteten den sullen wir in ab tun gar vnd gentzlich vnd ob in dar vmme verzogen wurde werltleich recht so geben wir in volligen gewalt daz si danne den selben schaden vnd ablegum an vns vodern mit gaistlichem rechten Auch hawen wir binent daz daz offtt genant guet Ode gelten sol jerlich fumfzehen metzen chorens vnd einen mutt habern vnd sechzich pfenninge fur ein swein vnd zwen metzen waitz vnd ein halibes pfunt fur diu stift vnd sullen sich di offtt genanten hern von Raitenhaslach erfaren von hinn vntz auf sand Marteins tache der schierst chomt ob iz den selben dienst wol muge vertragen oder nicht vnd swaz iz sein nicht mochtt vertragen daz sullen wir in widerlegen mit anderm gelt inner jars frist nach fier mann rat di wir paidenthalben da zue sullen nemen Der taidinge sind ziuge bruder Vlrich priol bruder Christan bruder Vlrich der Scharsacher bruder Peter oberr chellner bruder Ott guster bruder Berichtolt subpriol bruder Reicher chamrer bruder Frid[rich] vnderr chelner bruder Hinr[ich] von Hall munich ze Raitenhaslach Reicholf vnser amptman Hinr[ich] der probst von Maierhoven Winther der probst Vlr[ich] von Aw Frid[rich] von Puchsinge Hinr[ich] der Sneider vnd ander getriv leut genvege Vnd daz in daz also stet vnd vnuerchert bileib von vns vnd vnserr nachchumft geben wir in vnd irm gotshaus disen brief ze vrchunde versigelten mit des ersamen hern hern Wernharts des Grans insigel der daz nach vnserr gebet dar an gelegt hat ime an schaden vnder dem wir vns gentzlich verpinden vnd mit meinem insigel des obengenanten Ekkharts von Tann Daz ist geschehen due von Christes gepuertt worn vergangen driuzehen hundert jar in dem vierzigistem jar dar nach an dem auffert tage