Charter Document - 02520495

Den ersamen vnd weisen herren dem abbt vnd dem conuent des gotzhaws ze Raitenhaslach enbiut ich Engelprecht Rahenstamph purger ze Wasserburch Ekhart vnd Liebhart mein pruder vnser hawsfrawen vnd alle vnser erben vnsern dinst Wir lassen ewch wissen das wir Engelprechten den Loner purger ze Wasserburg seiner hausfrawen vnd sein erben auf haben geben vnd vns hintz in vertzigen haben aller der recht die wir von ewch gehabt haben auf dem gut ze Walthayming vnd pitten wir ewch fleissig das ir in die selben recht auf dem gut macht vnd verschreibt als ir wist das ir tun sullet wann wir ewch ledig sagen vmb das selb gut Vnd dar vmb zu einem vrchund geben wir disen brief versigelt mit Chunrad des schuelmaisters insigel ze Wasserburch iem an schaden da wir vns vnder verpinden Des sind zeugen Vlreich Chrayburger des Seler aidem Fridreich Chaufman Fridreich Scheffel Fridreich Ladrer purger ze Wasserburg Empel von Obingen Das ist geschehen do von Christi gepurt waren drewzehen hundet jar dar nach in dem newn vnd dreistzigistem jar an sand Erasm tag