Charter Document - 02520494

Ich Pab von Hocholting Alhait mein hausfrawe vnd Greimolt vnser baider sun verjehen offenbar an dem brief allen den di in sehent oder horent lesen daz wir mit verdachtem mut vnd mit gutem willen gegeben haben der sammung vnd dem gotshaus ze Raitenhaslach vnser gut daz gehaizzen ist Oed in Julbekcher gericht besuchts vnd vnbesuchtzs ze rechtem selgeret vnser vnd vnserer vorvodern in daz ampt daz gehaizzen ist di pitantze vnd haben si dez in nutzz vnd in gewer gesetzzt bey vnserm lebentigem leib mit aufgenomener beschaidenhait also daz si daz vorgenant gut handeln schulln vnd inne haben mit der stift vnd mit dreizzich pfenning gult di si jerleich da haben sullen vnd swaz ez mer alleinweis mag vergelten daz sol mir dem obengenantem Paben von Hocholting jarleich gentzleich geuallen zv mein ains leib vnd nach meinem tod ist ez gar vnd ledichleich dez gotzhaus von Raitenhaslach vnd der sammung da selben rechtzs selgeret daz wir noch dhain vnser eribe dar auf nicht mer ze sprechen haben Vnd in der beschaiden als vor geschriben ist haben wir vns dez oft genanten guts verzigen auf vnser frawn alter vnd antwurtten in daz gut fur ein lediges vnd vnuersprochens gut fur alle ansprach Vns habent auch di vorgenanten erber vnd gaistleich herren verhaizzen daz si jerleich vnser vnd aller vnser vorvordern vnd nachchomen jartag begen sullen an sand Achacii tag als gewonleich ist mit messen vnd mit ander gutteten di dar zv gehornt vnd daz alle wochen ein messe gesprochen werd datz dem selben alter vnd auch dez selben tages sol di pittantzze den obengenanten herren gevallen als gewonleich ist vmb ander pittantzz Vnd dar nach ob dez vorgenanten jartages pittantzz icht vberig peleib daz selb sullen si nizzen in der vasten swenn vnd wie ez in fugleich sei Vnd daz daz also stet gar vnd gantzz vnd vnzerbrochen beleih geben wir in disen brief ze einem vrchund versigelten mit meinem dez obengenanten Paben insigel Daz ist geschehen da man zalt von Christes geburtt tausent jar drev hundert jar dar nach in dem neun vnd dreizzigistem jar an sand Mathyas tag des zwelif poten