Charter Document - 02520493

Ich Metz de Schuestlin purgerin ze Tyttmaning vnd meinev chint Hainreich vnd Christan vnd Erntraut wir verjechen offenwar an disem prief allin den deu in sechent odir horint lesen daz wir mit guten willen vnd mit vertachtem muet vnd nach vnser freunt rat haben ze chauffen geben ein gut ze Nunraut daz in Tyttmaninger gricht gelegen ist daz vnser lehen gewesen ist von vnsern gnsedigen herren von Retenhaslach vnd von seinem gotshaus Jansem dem Goschaft vnd seiner hausfrawe vnd iern erben versuecht vnd vnuersuecht mit allen nutze de do zue gehorint Vnd haben im daz auf gegeben var vnsern gnedigen herren apt Velreichen ze Retenhaslach mit der beschaidenhait daz wir im verhaizzen haben fur Vlreichen mein sun vnd fur vnsern pruder vnd fur vnser erben vnd fur de seinen ob im chain chrieg von den an gienge odir seinem gotshaus da si scheden von nemin daz schulle wir im widercheren vnd richtig machen vnd schullen auch daz haben auf vns vnd auf allir vnser hab var allin leuten Wer auir daz daz mein sun Vlreich vnd vnser pruder zu dem lante chem vnd auf geb daz vargenant gut vnd sich verzig er vnd sein erben gar vnd gentzleich so schol vnser prief ledig sein Daz daz stet vnd vnzebrochen beleib dar vber geb wir in disen offen prief versigilt mit des erbern mans anhangunde insigil Fridreichs des Gaugsperger der zten selben zeiten lantrichter ze Tyttmaning gewesen ist im selber an schaden zu einem vrchunt der warhait dar vntir wir vns verpinten allir der gelub ze folfueren daz hie oben geschriben ist wan wir selben nicht aigens insigil haben Vnd ist der taiding zeug her Hainreich von Hall vnd Hainreich der Theusenperger Hainreich von Snitzing Fridreich der Ghrophil Christan der Weilhaimer Hainreich von Mairhofen Vlreich von Retenhaslach Der prief ist geben da man zalt von Christes gepurd drevtzehent hundirt jar in dem acht vnd dreizzigistem jar an sant Margreten tag