Charter Document - 02520491

Ich Hainreich Meinoltz svn purger in dem Hellein vergich vnd tvn chunt offenbar an disem prief allen den die in ansehent oder horent lesen daz ich mit wol bedahtem willen vnd mvt vnd nach meiner frevnt rat mich verzigen han vnd verzeich aller der ansprach die ich han gehabt gein dem ersamen abbt vnd der sammvnge ze Raittenhaslach vmb zwo werichstet in dem wald der genant ist der Vevhtenpach vnd haizzent die werichstet der Tieffenbach vnd der Durrenberch da von pin ich gestanden gar vnd gentzleichen wan ich dehain reht da niht het als mich mein friunt beweiset habent weder svnnenthalb noch schatenhalb ze paiden seitten Vnd daz div verzeichennvzze furbaz von mir vnd von meinen erben vnd von meinen frevnten allen dem vorgenannten abbt vnd der sammvng ze Raittenhaslach stet vnd vnuerchert beleib gib ich in disen offen prief ze einem waren vrchunde mit der erweren zwaier manne ynsigel versigelt Seibot dez Paizzen vnd Chunratz seins bruder in paiden an allen schaden Vnder der zwaier ynsigel di si durch meiner pet willen an den prief geleit habent verpint ich mich mit meinen triuwen alles daz stet vnd gantz ze pehalten daz vor an dem prief geschriben ist wan ich niht aigens ynsigels het Is sint auch pei der vorgenanten verzeichnvzze gebesen vnd sint sein zivge her Vlreich der Paizze rihter in dem Hellein vnd sein bruder Seibot vnd Chunrat vnd Fridreich der Pvb Fridreich der Schreiber Chunrat der Pierler vnd ander erber levtte Der prief ist geben nach Christes geburt vber driuzehen hundert jar dar nach in dem sechs vnd dreissigistem jare an sant Merteins tage