Charter Document - 02520490

Ich Vlrich der Spech purger in dem Hellein vnd mein eriben svn vnd tochter swie di genant sint di lebent oder noch chunftig werdent vergechen vnd tun chunt mit disem brief offenbar allen den di in sechent oder hornt lesen daz wir mit wolbedachtem willigen mut recht vnd redlichein ze chauffen haben geben vmbe dreutzechen pfunt Saltzburger pfenning durch di awge einen freyen wagenweg ewigichleichem zu den zwain lechen di genant sint ze Dornawe vnd ze nechst gelegen sint pey Prunnige den ersam vnd peschaiden herren hern Peter dem Chautzlein vnd hern Friderichein seim gesellen hofmaistern des nidern hoffes in dem Hellein vnd allen seinen nachchomen vnd pfelgern desselben hofes also mit der peschaidenhait vnd gelubden swer di eben benannten zwai lechen innen hat oder in swes gewalt sev chomen der sol denselben wagenweg zu den lechen innen haben vnd nutzzen vnd aribaiten swenne so sev des bedurfen pei nacht oder pei tag vnd sol der selbe wagenweg beslozzen vnd bewart sein mit zwain toern vnd sullen auch di innen haben Wir sullen auch dez oben benannten weges ier gewer sein fur allev ansprach an aller der stat vnd in des not vnd durft geschiecht vnd richtig machen als des landes recht ist Ez ist auch ze wizzen daz wir gentzlich vnd gar gericht sein des oben verschriben geltes da wir den oben benanten weg vmbe verchauft haben Wir haben auch den weg dester rechter verchauft zu dem oben benanten hof vnd lechen daz man ewigichlichein meiner sei vnd meiner paider hausvrawen vnd vnser fodern sel jerlich sol gedenchen vnd begen Vnd daz in daz also stet vnd vnverchert peleibe darvber ze einem vesten waren vrchunde der warhait geben wir disen offen vnsern brief versigelten vnd bestetigten mit meim anhangdem insigel darvnder ich mich mit sampt meinen erben verpinde mit meinen triwen di oben verschriben gelubd stet ze pehalten vnd ze volenden Vnd sint des gezeug vnd pei den gelubden gewesen her Virich der Paizze richter in dem Hellein Seybot der Paizze bruder Perichtolde in dem obern hof Jans der Leyter Vlrich der Spech des Siberer aidem Virich Gaugel der lange Meinhart Gotschalich der Leyter Sigel der Snitzzer Friderich der Schreiber Chunr[at] Igelspart vnd ander erberr levte Der brief ist geben nach Christes gepurde dreutzechen hvndert jar vnd in dem fumf vnd dreizikisten jar an sand Katreyn tag