Charter Document - 02520487

Ich Chunrat der Ekker ze den Zeiten richter in dem Weilhart vergich vnd tun chuntt offenbar an disem prief allen den di in sehent oder horent lesen daz Ludweig von Mullohen vnd sein pruder Ekkart vnd Wernhart chlagten vor mir auf offenem reht datz Ostermuting daz si ze Laubenpach von Raitenhasla her peuleuten wern oberuarn vnd vbersetzt mit ainem zeun auf ainer wis dev ze Laubenpach niden in dem veld leit vnd chlagten als verr daz beschew vnd Weisung dar auf gegebn wart Dar nach bedacht sich der obgenant Ludw[eig] vnd sein pruder vnd wurden des beweiset daz si dehain reht an der ansprach hieten vnd verzigen sich mit gutem willen mit meinem vrlaub der chlag vnd der ansprach gar vnd gentzlich si vnd all ir erbn vor offenem rehten vnd sagt do vrag vnd volig vnd wart auh zeugenuss gegebn den herren von Raitenhaslach daz si di genanten wis mit zeun mit grabn vnd mit wazzer als si heut ze tag leit haben vnd nizzen sullen ewichlich als ein ander ewis ledichlich vnd freilich sam ander ir aigen vnd sullen furbaz beleibn an all ansprach von Ludw[eig] vnd von seinen prudern vnd von allen iren erben Des sint zeuge Ott der Moringer Wernher der Tolweger Frid[reich] der Peuntner Rudolf von Weng Chunr[at] der Krumpech Ludw[eig] der smit von Ostermuting Winther der probst Frid[reich] von Zeidlorn Ekkart von Mullohen vnd ander erwer leut genueg Vnd daz div sache furbaz stet vnd vnbechrencht beleih dar vber han ich nach paider tail pet ze vrchund mein insigel gehangen an disen prief Der ist gegebn MCCCXXXV des mentags vor sunnwenten