Charter Document - 02520485

Wir Ott von gotes genaden pfallentzgraf ze Reyn hertzog in Bayern verjehen offenbar an dem brief vnd tun chunt allen den die in sehent oder horent lesen daz wir mit gutem willen vnd wolbedachtem mut nach allez vnsers rates rat vnd Weisung durch vnser vnserr vordem vnd aller vnserr nachchomen hayl vnd selde dem ersamen abtt Heinr[ich] vnd dem conuentt des gotzhauses ze Ratenhaslach dev genad vnd fuderung haben getan daz wir in zu irm vrbar ze Pernhaupten daz gelegen ist an der staynprukk in vnserm gericht ze Travnstayn gegeben haben vnd geben auch mit disem brif drev tagwerich wismats dev genant sint dev Odwis also daz si vnd auch allir nachchomen daz selb wismat besitzen sulen handeln vnd nizzen zu dem oben genanten irm vrbar ze Pernhaupten ewichleich als ir freyes aygen Vnd dar vber ze vrchunde geben wir in disen brif mit vnserm insigel versigelten Der ist gegeben ze Purchausen da v[on Chr]istes geburtt waren dreutzehen hundert jar dar nach in dem drev vnd dreizzigistem jar an sand Jacobs tag des heyligen zwelif boten