Charter Document - 02520484

Wir Heinr[ich] von gotes genaden pfallentz graf ze Reyn vnd hertzog in Bayern enbieten vnsern vitztumen richttern vnd gemainleich allen vnsern amptlauten vnser huld vnd alles gut Wir lazzen euch wizzen daz wir den ersamen abtt vnd den conuentt von Raitenhaslach in vnsern besundern scherm vnd genad genomen haben also daz wir in alle di hantuestt di si habent von vnsern vodern oder von vns gestatt haben vnd staten mit dem brief si sein vber gericht oder vber ander sache da von wellen wir vnd gebiten ev allen vestichleich bei vnsern hulden daz ir si an allen den briefen di si habent von vnsern vodern oder von vns mit nichtev irret laidigt noch beswart vnd in di gantzleich stat habt als ir vnser grozzev vngenad wellet vermeiden Vnd dar vber ze vrchund geben wir in den brief mit vnserm insigel versigelten Der ist gegeben ze Lantshut do man zelt von Christes gepurtt drevtzehen hundert jar dar nach in dem drev vnd dreizzigistem jar des nachsten freytags nach sand Peters vnd sand Pauls tag