Charter Document - 02520483

Wir Hainr[eich] der Grasman richter vnd di gesworen vnd di gemain der pvrger der stat ze Muldorf verjehen vnd tvn chvnt offenbar an disem brif allen den di in ansehent horent oder lesent daz vor vns auf offen rechten Zachreis von Vrtail den hof ze Vrtaiel den er inne het vnd gehabt hat von den erbern hern vnd gotzhaus von Ratenhaslach ledigen vnd frein auf gesant hat vnd ledich lazzen hat fur sich vnd fur alle sein erben vnser fraown gotzhaus datz Ratenhaslach vnd den erbern hern hern Hainreich dem abt vnd dem convent da selben nach seinem tod Vnd ist des von im trager gewesen Ditmar der chastner vnd Chvnrat der wirt hinder der chirrichen pvrger ze Mvldorf di es auf offem recht ze Mvldorf auf ier aid vor vnser gesagt habent daz der vorgnant Zachreis den vorgnanten hof mit seinem verdachten guten willen do er es mit verdachten mut wol getun mocht bei in auf sant vnd an seiner stat ze geben dem erbern vorgnanten gotzhaus vnd herrn wan er es vor sichtum selb dev handlvng nicht gehandlen mocht Vnd habent auch di vorgnanten hern vor vnser auf offen rechten di stet in genomen Es ist auch ze merchen daz der egenant Zachreis ein hantfest het vmb den egenanten hof vnd von dem egenanten gotzhaus vnd hern di selb hantfest gab er behalten Chvenraten dem Zwelifar purger ze Mvldorf dem got gnad auf sein triwe Do der selb Zwelifar gestarib vnd er gedacht den hof ze geben vnser frawn gein Ratenhaslach als er getan hat do fodert er di hantfest an des Zwelifars chind vnd wolt die wider geben haben vnd toet haben Da verhabten si im di hantfest als ferre daz er si zv dem rechten not mit dem fronpoten Auf daz recht chom Chvnr[at] der Zwelifar vnd etleichev sein geswistreit di swuoren daz si der hantfest nicht inne hietten vnd auch dar nach nichtz ze sprechen Engelschalich des Zweliffer svn Chvnr[at] brvder het di hantfest inne vnd waich mit der hantfest von dem rechten aus dem pot Da pracht frag vnd vrtaiel auf offem rechten vor vnser seint Zachreis dev selb hantfest seinem vater behalten hiet geben auf sein triwe vnd er mit der hantfest aus dem rechten vns aus dem pot gewichen waer dev selb hantfest schult tod sein vnd allen den vnhilfleich die si fur trvegen vnd dem oft genanten gotzhaus vnd abt vnd hern vnschedlich sein vnd allen leuiten Daz daz wor sei vnd auf offem rechten vor vnser also sich ergangen hab geben wir in disen brif mit vnsern annehangvnden insigel zue einem vorchvond der warhait Daz ist geschehen do man zalt von Christes geburd drevtzehen hvndert jar dar nach in dem drev vnd dreizzichisten jar an sande Achacii tag