Charter Document - 02520481

Wir Heinr[ich] der elter von gots genaden pfallentzgraf ze Reyn vnd hertzog in Baieren enbieten vnserm vitztum richtern allen vnsern amptlevten allen vnsern edeln levten vnd gemainlich allen den di in vnserm lande gesezzen sind vnser huld vnd alles gut Wir lazzen evch wizzen daz wir dem ersamen abtt von Raytenhaslach di genad haben getan daz wir in sein gotshavs sein levt vnd gut swa er daz hat vberal in vnserm lande oder avzzerthalben vnsers landes in vnsern besvndern schirm vnd genad genomen haben vnd haben in sein levt vnd sein gut ietzv den chrieg avzz vnd avzz fur vns vnd fur di vnsern versichert Vnd da von wellen wir vnd gebiten ev allen vestichlichen bei vnsern hulden daz ir den selben abtt sein levt vnd sein gut mit nichtev irret enget noch beswert mit dhainen Sachen vnd beschirmt in von vnsern wegen an seinen levten vnd guten swa er daz hab vnd lat in seinen frvm da mit schaffen als ir vnser grozz swer vngenade wellet vermeiden Vnd dar vber ze einem vrchvnde geben wir im den brief versigelten mit vnserm insigel Der ist geben ze Lantshut millesimo CCC tricesimo secundo des mitichen nach sand Jacobs tag