Charter Document - 02520480

Ich Fridreich der Awer ze den zeiten richter ze Julbach vergich vnd tvn chunt an disem offen brief allen den di in ansehent oder horent lesen daz Wolf hart der Mayer von obern Julbach Fridreichs svn aus dem Rawt vnd sein hausfrawe Chuningvnt vnd ir paider eriben svn vnd tochter di nv lebent oder noch chunftig werdent ir gvt datz Perchaim habent chevefleich ze chauffen gegeben den herren vnd dem gotzhavs ze Retenhaslach fver ein vreiz vnd ledigiz aygen vnd hat auch in daz selb aygen mit Heinreichs des Plvemelpergers hant der des vorgenanten gvetz rechter salman was vor dem rechten auf gegeben als ertailt ward Avch schol der vorgenant Wolfhart des e genanten gvetz ze Percheim gewer sein jar vnd tag vnd Heinreich der Plumelperger trager sein auch jar vnd tag der obgenanten herren vnd des gotzhavs ze Reitenhaslach ob in sein durft wirt Daz hat Wolfhart geheizzen vnd der ob genant salman gelubt vor dem rechten als ertailt ward Des sint zevg her Pob vnd her Eb di Hocholtingner der Sweikker der Seifristorfer Chunrat der Seyfristorfer Hertel der Scol Albrecht von Tann Wolfhart der Winichingner Wernhart der Oder Vlreich der Smid Fridreich von Pvech Chunrat der Hveber da selben Chunrat der Tytler vnd ander erber levet Daz di red vnd di tayding stet vnd vnuerchert beleiben darvber zv einem vrchvnde gib ich den herren vnd dem gotzhavs ze Reitenhaslach disen offen brief versigelt mit meim insigel Der brief ist geben do man zalt von Christes gepurd tausent jar drev hvndert jar in dem zwai vnd dreizzikisten jar darnach an dem andern mittichen nach dem lyechtmisse tag