Charter Document - 02520479

Ich Vlreich der Wiettinger purger in dem Hellein vnd mein hausvrawe Elspet vnd alle vnser erben wir verjehen vnd tvn chunt an disem priefe allen den die in ansehent lesent oder lesen horent daz wir dem kaistleichen herren hern Peter dem Cheutzlein der hofmaister in dem nidernhofe in dem Hellein do waz vnd seinem gesellen hern Otten vnd dem hofe verchauft vnd geben haben vmb zwainzich Schillinge Saltzburger phenninge vnd vmb sehtzich phenninge vnsern chinden ze leitchaufe alle die werichstet vnd allez daz reht daz wir in der Gaizzawe haben gehapt niden vnd oben di in den nidern hofe haben gehoeret vnd die vns an habent geerbent von vnserm vater Otten von Wiettinge vnd mich Vlrichen vnd mein erben angefallen sint mit rehter schide do ich vnd mein bruder Otte vnd mein lieber ohaim Chunrat Ortolfs sun den meins bruder Hainreichs werichstet angefallen sint die weristet tailtent die vnser vater lassen het dez schiedleut waren Chunrat der Hurnein vnd Chunrat der Tenke Vns habent auch die vorgenantten herren dez vorgenantten gvetz gar vnd gentzleichen verrihte vnd geben Vnd da von schullen wir furbaz noch dehain vnser erben dehainen chriege noch dehain ansprach auf die vorgenantten werichstet haben Pei dem chauffe vnd pei den sachhen sint gebesen vnd sint sein zivge Chunrat der Tenke Hainreich Hainreichs sun auf der Mauwer Hainreich Mentzinch Jacob der Neuzse Chunrat der Pierler vnd sein bruder Hainreich Fridreich der Schreiber vnd ander erber leutte Dar zv daz den vorgenantten herren vnd dem hofe von vns vnd von vnsern erben daz also stete vnd vnzebrochen beleihe dar vber geben wir in disen offen priefe ze einem waren urchunde mit meins Vlreichs lieben ohaims Chunratz Ortolfs svns ynsigel versigelt im an schaden da wir vns vnder verpinten mit vnsern triwen alles daz stet vnd gantz ze behalten daz vor an dem priefe geschriben ist wan wir niht aigens ynsigels haben Der prief ist geben nach Christes geburt vber driuzehen hundert jar dar nach in dem ains vnd dreissigisten jare an sant Laurencii tage