Charter Document - 02520476
Charter Number: | 02520476 |
---|---|
Cartulary Title: | Die Urkunden des Klosters Raitenhaslach : 1034-1350 |
Charter Language: | German |
Charter Origin: | Lay |
Charter Type(s): | Sale |
Date: | 1330 |
Date type: | Internal, A.D., Feast |
Resource Link(s): |
Monasterium.net |
Charter:
Ich Metz deu Schuhstlinn purgerinn datz Tytmening vnd mein sun Vlrich Hainr[ich] vnd Christan vnd mein tohter Erndraut vnd Elzbet vergehen an disem prief allen den di in horent oder sehent lesen daz wir den hof datz Ettenew pei Esten der gelegen ist in der grafschaft ze Tytmening besuht vnd vnbesuht mit allen den nutzen di dar zu gehorent haben ze chauffen gegebn den erwern herren apt Hainr[ich] vnd der sammung ze Raitenhaslach vmb zwaintzig pfunt Salzb[urger] pfenning vnd vmb ain schaf chorns vnd vmb drey grob roche ze leitchauff den obgenanten Vlr[ich] Hainr[ich] vnd Christan vnd habn auh in den genanten hof aufgegebn mit herren hant von den er vnser reht lehen waz daz ist Ot der Moringer Hainr[ich] vnd Andre di Moringer gar vnd gentzlich daz wir furbas noh chain vnser erbe vnd nachchomen dar nach chain ansprach nimer mer gewinnen oder habn sullen Vnd sint des zeug di da bei warn Ot der Moringer Berchtolt der Zink Frid[rich] von Inspruk Wernher Lendel Chunr[at] der Vetsch Rudel der Chursner purger ze Purchusen Alphart Christan der Weilhaimer Christan der List Chunr[at] der Gwikker purger datz Titmening vnd ander leut genueg Daz in daz also stet vnd vnuerchert beleih gebn wir disen prief dem obgenanten chloster ze Raitenhaslach ze einem ewigen vrchund mit des erwern mannes hern Chunr[at] von Chuchel insigel im an schaden der ze den zeiten purchgraf waz ze Tytmening wan wir selber aigens insigels niht heten Der prief ist gegebn nach Christes gepurt vber dreuzehen hundert jar dar nach in dem dreizzigsten jar an sant Andres tag