Charter Document - 02520475

Wir Heinr[ich] von gots genaden pfallentz graf ze Reyn vnd hertzog in Baieren verjehen offenbar an dem brief wan di Moringer von der lehenschaft an dem hof ze Ettenaw bei Est in Titmenninger gericht di si von vns heten mit gvtem willen vor vns gentzlich gestanden sind also daz si vnd ir erben furbas dhain ansprach dar nach haben mvgen noch gewinnen ewichlich sein wir durch vnser vnsrer vorvodern vnd nachchomen ewiges hail vnd seld von derselben lehenschaft auch gestanden vnd haben den oben genanten hof ze Ettenaw dem gotshavs vnd den herren ze Raitenhaslach geaigent also daz daz selb gotshavs vnd di herren daselben den oben genanten hof inne haben sullen vnd nizzen ewichlich mit alle di vnd dar zv gehort besucht vnd vnbesucht an alle ansprach vnd ierrvng als ander ir aigen gvt vnd vrbor Vnd dar vber ze einem vrchvnd geben wir in den brief versigelten mit vnserm insigel Der ist geben ze Purchausen da von Christs gebvrtt waren drevtzehen hvndert jar dar nach in dem dreizzigistem jar an sand Katerein abent