Charter Document - 02520472

Ich Chunrad der Abbt purger ze Purchausen vergich vnd tun chund offenbar an disem brief das der ersam herre abbt Ilsunch von Raitenhaslach vnd sein sammung heten lassen mir vnd meiner hausfrawn Vten der got genad zu vnser paider leiben vnd nicht lenger ir haws ze Purchausen vnd ain hub datz Vbreakchen dew gehaissen ist Dornperch Nw han ich hernach nach meiner vorgenanter hausfrawen tod mit meinem oben genanten herren von Raitenhaslach getaydinget also beschaidenleich das ich gar vnd gantzleich gestanden pin von dem haws ze Purchawsen vnd sol darnach furbas chain ansprach haben noch chain mein erib oder mit frewnnt vnd sol alein die vorgenanten hub inne haben mit nutz vnd mit gelt zu mein aines leib vnd nicht lenger vnd sol nach meinem tod weder mein hausfrawn Diemut noch chain mein erib oder mein frewnnt nach der hub chain ansprach haben wann sy den ledig sol sein vnd auch ist dem oftgenanten chloster ze Raitenhaslach Ich sol auch die genanten hub gein niemant vmb chainerlay sach verchumeren Das den genanten herren von Raitenhaslach das alles stat vnd vnuerchert beleib gib ich in disen brief ze ainem vrchunde mit meinem insigel vnd mit des erwergen ritters hern Stephans von Hochenart der ze den Zeiten richter was ze Purchausen insigeln der das nach meiner pet dar an geleit hat Des sind gezeug her Hainreich der Chastner Ott der Moringer Perichtold der Zinck Fridreich von Inspruck Seyfryt der jung alle purger ze Purchausen vnd ander pider lawt genueg Der brief ist gegeben ze Purchausen anno domini MCCCXXVIIII an sand Laurencen tag