Charter Document - 02520471

Wir pruder Heinreich apt ze Raitenhaslach mit aller vnsern samenunge verjehen an disem prief daz wir mit gutem willen vnd gemainem rat zv der zeit do wir ez wol getvn mochten haben lazzen dem erberem manne herm Eberharten phleger ze Liechtenstain vrowen Agnesen seiner hausvrowen vnd Eberharten ir paider svn zv ir drein leiben vnd niht lenger vnsers chlosters zwen weingarten di gelegen sint ze Engelschalsdorf der aine haizt der Schreiber der ander der Pleuer also beschaidenleichen daz si vns alle jare da von dienen sullen in dem lesen echt vnd zwainzig ember weines auz dem Schreiber vnd echt vnd zwainzig ember auz dem Plever pei dem pestem an allen chrieg vnd irresal vnd suln wir vnser poten da pei haben dem sullen si die chost geben an vnsern schaden vntz si vns den genanten wein geantwurtent hintz Wienen auf die Tunaw in vazzen die si vns dar zv geben sullen an ain schef daz wir in da bezaigen an alle vnser mve vnd schaden Si suln ouch daz perchreht vnd den zehenten von den zwain vorgenanten weingarten selben geben Geschech aver daz si vns des oben genanten weins niht geben in dem lesen so sullen si vns fur den wein geben ehtzehen phunt Wienner pfenninge an sant Cholmans tage nach dem lesen teten si des niht swelchen schaden wir dann der selben pfenningen nemen an den Juden den sullen si vns ab tun vnd sullen wir den schaden mit sampt dem houbguet haben auf allem dem gut daz si denn in Osterreiche habent Auch sullen si vns die zwene oft genanten weingarten alle jare wol grueben vnd dreistund hawen vnd swaz des ander pawes sol sein in den Weingarten daz sol hintz iren trewen sten Als oft ouch si der paw ains vorsaumten in den genanten Weingarten so sullen si vns ie fur der paw ains zwo march silbers geben mit allem dem reht als vor geschriben ist Wer ouch daz die oben genanten her Eberhart vrow Agnes sein housvrowe Eberhart ir svn mit gewalt oder an reht von vnsers chlosters wegen der genanten weingarten wurden entwert daz sullen wir in richtig machen teten wir des niht so sint si vns des selben jares des oben genanten zinses niht gepunden ze geben vnd sol vns daz furbaz andreu jare an schaden sein Vnd wer ouch daz si etsleiches jares von gemainem lantschaden oder gepresten der genanten weingarten chainen nutz mechten gehaben des selben jares sint si vns ouch niht gepunden des oben genanten zinses ze geben vnd sol vns ouch daz furbaz ain ander jare niht schaden an vnserm zinse Ez suln ouch die vorgenanten weingarten nach der vor genanten dreier leib tod vnserm chloster ledich sein an alle ansprach Geschech auer daz der dreier leib ainer zwen oder alle drei verschieden vnd daz der leste leib daz paw in den weingarten an gevangen hiet so suln des selben erben daz paw des selben jares volfuren vnd sullen vns den oft genanten zinse do von dienen vnd suln vns dar nach die weingarten gar vnd gentzleich ledich vnd lose sin an alle widerrede Ez sullen ouch die vorgenanten drei leib die genanten weingarten weder Juden noch Christen versetzen oder verchvmbern an vnsern willen wizzen vnde gvnst Vnd wer ouch daz die oben genanten drei leib die oben geschriben taidingen vberfuren so suln si gevallen sein von allen den rehten die wir in gegeben haben als oben verschriben ist an den genanten weingarten Daz diseu sache stet vnd vnzebrochen beleib dar vber geben wir in disen prief ze ainem offenemen vrchunde versigelten mit vnserm insigel daz dar an hanget vnd sint des ouch gezeuge pruder Leutwein vnser prior ze Raitenhaslach pruder Wachsmut der ober chelner pruder Vlreich der Muldorfer vnser hofemaister ze Chremse pruder Otte vnser vnder chelner pruder Heinreich hofemaister in Zwetler hofe maister Pernolt her Dietreich der chvneginne schreiber her Vlreich der hertzoginne schreiber her Stephan der Chriglaer zv den zeiten purgermaister ze Wiennen her Niclas von Eslarn her Heinreich der Rorer vorspreche ze Wiennen vnd ander piderb leut genuch den diseu sache wol chvnt ist Der prief ist geben ze Raitenhaslach nach Christes gepurt vber dreuzehenhundert jare dar nach in dem echt vnd zwainzigistem jare an sant Niclas tage