Charter Document - 02520469

Wir bruder Hainreich abbt des gotzhaws ze Raitenhaslach vnd aller vnser conuent verjehen offenbar an disem brief das wir Engelprechten den Rahenstamph purger ze Wasserburg Ekharten vnd Liebharten sein brudern vnd allen iren erben gelassen vnd bestatigt habent alle die recht die Seibot der Pfaffinger Chunrats des Pfaffingers sun vnd alle sein erben gehabt habent auf dem vorgenanten gut ze Walthalming in allen den rechten vnd hie oben verschriben ist wann der vorgenant Seibot der Pfaffinger die recht die er het auf dem selben gut von rechter ehafter not verchauft hat vnd hat auch Seybot der Pfaffinger Chunrad sein bruder vnd Fridreich sein brudera fur sich vnd fur alle ir erben verzigen vnd habent vns aufgeben alle die recht die si gehabt habent auf dem vorgenanten gut gar vnd ganczleichen Des sind zeugen her Haidenreich von Schalichtorf Chunrad Schreiber richter ze Wasserburg Vlreich Grissel Ortwein Priennar Chunrad schulmaister ze Wasserburch Hainreich Schreiber Eberhart Hainreich von Snaicze Das in das stat vnd vnzebrochen beleib geben wir in disen brief versigelt mit vnserm insigel Das ist geschehen do von Christi gepurt waren drewzehen hundert jar dar nach in dem acht vnd zwaintzigistem jar des nachstens freitags nach sand Vlreichs tag