Charter Document - 02520468

Wir der rat vnd dy gemain der burger ze Wasserburch vergehen offenbar an disem brief daz vns der erberge herre abbt Hainr[eich] des gotzhaws ze Raitenhaslach vnd aller sein conuent ewichleichen gelassen habent iren aigen garten ze Basserburch bey sand Jacobs chirichen do wir ein prunnen auf gemacht haben vnd sullen wir auch ewichleichem dem vorgenanten gotzhaws geben alle jar von demselben garten an sand Merteins tag von der heligen gelt ze Wasserburch sechsvnddreissich Municher pfennig vnd sullen daz tun der heyligen pfleger ze Wasserburch Das in das stat vnd vnzebrochen beleib geben wir in disen brief versigelt mit vnser stat insigel Das ist geschehen do von Christi gepurt waren drewzehenhundert jar darnach in dem acht vnd zwaintzigistem jar des freytags nach sand Vlreichs tag