Charter Document - 02520467

Ich Chunrat der Sibrer purger vnd hellinger in dem Hellein vnd mein zwen svne Chunrat vnd Hertneid wir verjehen vnd tvn chunt an disem priefe allen den die in ansehent lesent oder lesen horent daz div peunt div genant ist daz Gotzenvelt vnd hat gehort in den nidern hofe in dem Hellein div vns vnser lieb herren her Hainreich der ersam abt ze Raittenhaslach vnd div sammvnge daselben verlihen vnd lassen habent zv vnser drin leiben alle jar vmb ohtzich phenninge Saltzburger mvnzse di wir der von geben schullen ze dienst an sant Ruprehtz tage in dem herbest in den nidern hofe in dem Hellein Div selbe pevnt ist frei vnd ledig nach vnserm tode wenne wir drei nimmer sein oder swenne wir die vorgenantten ohtzich phenninge an sant Ruprehtz tage in dem herbest oder in vierzehen tage zehant der nach niht geben so ist si auch ledig vnd frei von vns vnd gehort wider in den nidern hofe in dem Hellein mit allem dem reht vnd si vor gehort hat versvhtiv vnd vnversvhtiv vnd hat dehain vnser nachchunft noch vnser erben furbaz niht derauf ze sprechen noch chain reht derauf ze haben Daz daz also stete vnd vnzebrochen dem vorgenantten gotzhaus ze Raittenhaslach vnd irem hofe in den Hellein von vns beleihe vnd von vnsern erben vnd von aller vnser nachchumft darvber geben wir in disen offen priefe mit hern Velreichs dez Paizzen anhangvndem ynsigel versigelt der do rihtter in dem Hellein waz vnd nach vnser pet sein ynsigel an den prief geleit hat im an schaden vnd mit meinem Chunratz dez Sibrer ynsigel auch versigelt da wir vns Chunrat vnd Hertneid vnder verpinden mit vnsern triwen wan wir dannoch niht aigener ynsigel heten Der prief ist geben nach Christes geburt vber driuzehen hvndert jar darnach in dem eht vnd zwainzigisten jare an sant Johannes ewangelisten tage als er in daz ole wart gesatzte