Charter Document - 02520466

Ich Johanns der Vbracher vnd Hartneid mein bruder verjehen vnd tun chunt an disem brief allen den die in sehent oder horent lesen die nw lebent vnd her nach chunftig sind das wir mit gutem vnd wol bedachtem willen vnser frawn ze Raitenhaslach auf iren alter gegeben vnd aufgeselt haben vnser aigen datz Obernzahhenhaim lauterleich durich got vnd vnser sei hail vnd auch aller vnser vodern vnd vnser eriben mit der geschaidenchait als her nach geschriben ist das die herren datz dem genanten chloster ze Raitenhaslach alle jar ewichleich an vnsers vatter jartag herren Albrechts dem got genad sullen singen vigilii vnd selmess vnd sol wer den abbt ist den herren an dem selben tag ein gut mal geben von vischen vnd von wein von des vorgenanten aigens dinst das wir in dar vmb ledichleich fur vns vnd fur alle vnser erben gegeben haben das si es ewichleich niessen vnd haben sullen mit allem nutz besucht vnd vnbesucht freileich vnd aigenleich ze rechtem selgrat als ander ir gut Vns sullen auch die obgenanten herren tailhaftig machen aller der guetat vnd als des diensts des in irem chloster got erpoten wirt ewichleich mit singen mit lesen mit messen mit vasten mit wachen mit almusen mit gepet vnd gemainchleich mit allen guten vnd gaistleichen werichen Vnd das den oft genanten herren vnd irem chloster das obenuerschriben selgrat das wir in gegeben haben stat vnd vnzebrochen beleih dar vmb geben wir in disen offen brief ze einem ewigen vrchund an den nach vnser grosser pet her Johanns von Toring sein insigel gelait hat wann wir selb aigner insigel nicht heten Des sind zeug her Hainreich der abbt ze Raitenhaslach pruder Lautwein der prior pruder Ott der vnderchelner pruder Hainreich der Tachinger munich da selb Albrecht der Vbracher des Alrams sun Fridreich der Wetdinger Christan von Purchawsen Hainreich der Trenn vnd ander pider lawt genueg Der brief ist geben nach Christes gepurt vber drewzehen hundert jar dar nach in dem acht vnd zwaintzigistem jar an sand Mathias tag