Charter Document - 02520465
| Charter Number: | 02520465 |
|---|---|
| Cartulary Title: | Die Urkunden des Klosters Raitenhaslach : 1034-1350 |
| Charter Language: | German |
| Charter Origin: | Lay |
| Charter Type(s): | Grant |
| Date: | 1327 |
| Date type: | Internal, A.D., Feast |
| Resource Link(s): |
Monasterium.net |
Charter:
Ich Vlreich der Ayeer purger ze Pazzew vergich an disem brief allen den di in sehent oder horent lesen daz icha geworfen han an meinen herren den abbt Hainr[ich] von Raytenhaslach vnd an seinen conuent daz si mir vnd meinen suenen Vlrichen vnd Johan habent lazzen ir aigen di sag ze Wisingen in Waldzeller pfarr mit der beschaidenhait daz wir in ze vnsern leiben di weil wir leben all jar gebn sullen sehtzig pfenning Pazzewer da von ze dienst an sant Michels tag oder hin nach in vierzehn tagen Swenn wir daz verseumten so wern wir gar geuallen von allem dem rehten daz si vns lazzen vnd gegebn habent an dem oben genanten irem aigen Der teiding sint gezeug Arnolt vnser amptman Hainr[ich] der Schrot Hainr[ich] der Ayerer vnd ander biderb leut genueg Wir pinten vns auh ich obengenanter Vlrich vnd Johans vnder vnsers vater insigel daz an dem brief leit gern ze behalten daz obn verschriben ist Der brief ist gegebn ze Pazzew nach Christes geburt vber drewzehnhundert jar dar nach in dem sybenvndzwaintzigsten jar an sant Marteins abent