Charter Document - 02520464

Ich Jans der Pollinger vnd mein hawsfrawn Elspet vnd mein sun Rudel vnd alle mein eriben verjechen vnd tun chunt offenleich an disem brief allen den die in ansehent oder hornt lesen das wir ze chauffen haben geben chaufleich vnser aigen ze Polling die da haisset in dem lechen Albrechten dem Widmar vnd seinen eriben auf einen wider chauf auf die lichtmesse die schirst chumpt vnd haben iem das selben aigen geben vmb sechs phunt Regenspunger pfening in solicher beschaiden ob wir iem oder sein eriben ob er nicht enwar das got nicht geb die selben pfening nicht engaben auf di vorgenanten frist so hat es sich in veruallen gantzleich in allem dem recht vnd es vnser was fur ein rechtz aigen vnd sullen wir das selben aigen weder versetzen noch verchauffen vnd sullen es losen nur von vnserm gut Ist aber das wir iem der selben sechs phunt weren vor der liechtmess oder an dem liechtmesstag so ist es wider ledig vnser als vor Vnd das dem selben Albrechten Widmar vnd seinem sun Fridlin vnd andren seinen eriben das das also stat beleib gib ich vorgenanter Jans der Pollinger iem disen offen brief ze einem waren vrchund versigelt mit meinem selbers anhangunden insigel Des sind zeug Hainreich der Enn Andre Moser H Scheibnzwicher der Chraftel der Chreiwer Chunrad der wirt vnd ander pider lawt genueg Datum et achtum in Muldorf anno domini millesimo CCC vicesimo VII in nativitate sancti Iohannis baptiste