Charter Document - 02520463

Wir bruder Ylsung abbt ze Raytenhaslach mit aller vnser sammung verjehen an disem brief allen den di in sehent oder horent lesen di nu lebent vnd her nach kvnftig sint daz der ersam herr her Hartlieb von Puchperch mit seiner gutet an vns geworuen hat daz wir alle jar ewichlich sein vnd seiner voruodern jartag begen sullen nach vnsers ordens gewonhait an dem pfintztag in der osterwochen daz haben auh wir im gelobt vnd gehaizzen Also hat auh der ersam man her Fridrich der mautner von Purchausen mit seiner gutet an vns geworuen daz wir begen sullen sein vnd seiner voruodern vnd seiner heusfreun vreun Marg[ret] der got genade jarzeit alle jar an dem nechsten tag nach dem ebenwich tag Vnd an den zwain tagen sol man geben vnserm conuent zwen gut dienst von vischen vnd sol man di nemen von den zwain hofen datz Pebingen di wir dar zu gechauft vnd gegebn haben Wir haben auh dar zu gegebn ain gut ze Mitterhulgen daz gilt vierdhalben schillinch Otinger pfenning an chlainen dienst Wir sullen auh von den genanten drein guten vier ander jarzeit begen alle jar ewichlich des ersten vnsers gotshaus stifter des erwern herren hern Chunr[at] des ertzbischofs von Salzpurch hern Wolf hers von Tegernwanch vnd vnser guten freunt Peters des Cheutzleins von Salzb[urch] Meinhartes des Newmaisters vreun Dietmuten der Voglin Wernhers euz der Milichgazzen von Pazzew vnd ander vnser guten freunt Vnd dar vmb sol man vnserm conuent geben von den obngenanten drein guten vier dienst von vischen an vier tagen an sant Benedicti tag an sant Bernharts tag an aller sel tag vnd an dem nehsten tag nach sant Lamperti tag Es sol auh swer denn vnderchelner ist von den oft genanten guten den grozzen dienst in nemen vnd di stewer der chlain dienst sol geuallen in di gemain dem conuent vnd swer denn herr vnd abbt ist der sol dev stift in nemen Auh sol der vnderchelner di vorgenanten dienst der sammung geben vnd volfuren als oben verschriben ist Swenn er des niht tet vnd verseumet so sol er bei seiner gewizzen ain wein sein vntz er ie den dienst gegeb trunch er dar vber wein so sol zv altar ze mess niht chomen vntz er es gar vnd gentzlich geb vnd volfur Gescheh aber dehain verseumung an dem gescheft so sol vnser vater vnd weiser der ersam abbt von Salem als ain dienst verseumet wurde des niht geschehen sol alz oft daz gescheh ain pfunt Otinger pfenning in nemen von vns vnd sol daz seinem conuent hin haim bringen vnd geben Er sol auh alle jar mit fleizz in der Weisung fragen vnd vorsehen ob daz obngenant gescheft wol volfurt sei vnd sol man im dar vmb ze vrchund alle jar in der Weisung geben viervndzwaintzig pfenning Regens[purger] Vns hat auh der ersam man her Hainr[ich] von Hoholting zwai gut datz Cholbach gegebn daz man da von durch seiner sel willen an ettlichen tagen dem conuent visch geben sol als sein hantfest sagt di wir dar vber von im haben von den sol auh swer vnderchelner ist den dienst in nemen vnd sol da von volfuren alz er geschaffet hat Vnd wurd von den guten allen dev oben geschriben sint ichtes iht vber di dienst di man da von tun sol daz sol der vnderchelner an legen nach des prior vnd des subprior vnd zwaier altherren rat dem conuent ze pezzrung Daz daz alles vnzerprochen beleih geben wir disen brief ze ainem ewigen vrchunde an den nach vnser grozzen pet di ersamen herren abbt Vlrich von Kayshaim vnd vnser weiser abbt Chunrat von Salem irew insigel geleit habent zesampt dem vnsern Der ist gegebn nach Christes geburt vber derewzehen hundert jar dar nach in dem sibenvndzwaintzisten jar an sant Barnabe tag