Charter Document - 02520462

Wir Hainrich vnd Eberhart von Harschirchen verjehen offenbar an disem brief daz wir durch vnser vrowen willen vnd durch vnserr vodern sli willen vnd euh vnsers selbes hail vnd selt vns verpflicht haben mit solhem gelube hintz dem ersamen abbt Ylsungen vnd hintz seinem gotsheus ze Raytenhaslach daz wir paide vnd vnser paider erben vnd nachchunft immer mer ewichlich sullen leihen den zehent des dorfes datz Harpollen an alle widerred vnd an allen schaden irs gotsheus leuten swelih si vns antwurten vnd davon so haben wir den selben zehent verlihen Hainrichen dem Chirhperger irem prost datz Zeydlorn Chunraten irem prost datz Oberhofen Hainrichen des chlosters sneider Ylrichen von Halspach des abbtes choch also daz di vorgenannten vier man des genanten zehentes trager vnd behalter sein des vorgenanten gotsheus ze Raytenhaslach vnverschaidenlich an schaden Vnd swenn di niht sint swen si vns denn stellent oder vnsern erben den sullen wir den vorgenanten zehent leihen ewichlichen an schaden daz si in tragen vnd behalten dem genanten gotsheus allen weis als oben von den viern verschriben ist Vnd wan ich Eberhart von Harschirchen dannoh aigens insigels niht het verpint ich mich der vorgeschriben teidinge allen weis zv meinem vetern hern Hainr[ich] von Harschirchen vnder sein insigel Des sint gezeug her Hainr[ich] der prior ze Raytenh[aslach] her Gebhart der Chalb her Frid[rich] von Pyburch her Vlr[ich] der chelner Chvnrat von Palmperch Chvnr[at] der chamrer von Teysing Hainr[ich] der Raich Chvnr[at] der Titler vnd ander piderb leut genueg Daz div teidinch stet vnd vnverchert beleiben gib ich Hainr[ich] von Harschirchen disen brief mit meinem insigel fur mich vnd fur meinen vetern Eberharten der sich dar vnder verpunten hat zv mir dem genanten gotsheus ze ainem ewigen vrchund Der brief ist gegebn nach Krystes geburt vber drevzehnhvndert jar dar nach in dem sehsvndzwaintzigsten jar an sant Elzbeten tag