Charter Document - 02520460

Ich Rudolf vnd ich Meingos di Schichen in dem Grazzewer tal verjehen an disem brief allen den di in sehent oder horent lesen daz wir mit gutem willen vns verzigen haben einer ansprach di wir heten vmb ein aigenschaft hintz Offneyn Fridreichs heusfrewn von Evenhausen vnd hintz ir erben vnd allen iren nachchomen vnd haben si ledichlich gegebn vnd euf geselt vnser vrewen auf ir altar ze Raytenhaslach wir hieten reht oder vnreht an der ansprach Vnd ze ainem vrkvnd der selben verzeihenuzz fur vns vnd fur alle vnser nachchomen gebn wir dem genanten gotsheus ze Raytenhaslach disen brief versigelten mit des erwergen herren insigel hern Albrehts von Nevnchirchen der daz nach vnser bet vnd fleg dar an geleit hat wan wir selb aigner insigel nicht heten der euh di weil daz Grazzewer tal inn het vnd sein pfleger waz Des sint gezevg di da bei gewesen sint her Vlr[eich] prior ze Raytenhaslach her Gebhart der Chalb her Hainr[eich] der Oler her Ott von Rot mvnich da selb Chvnrat der Torer von Pusenhausen Dytreich der Heroltshaimer Wernh[er] von Scherding Hainr[eich] der Tren Syfrid der probst Hainr[eich] von Tal Hainr[eich] von Wessen Engelbreht von Freylsmos vnd ander biderb leut ein michel tail Der brief ist gegeben do man zalt von Kryst geburt drevzehen hvndert jar dar nach in dem sehsvndzwaintzigistem jar an dem freytag vor pfingsten