Charter Document - 02520459

Wir bruder Ylsung[us] abbt ze Raytenhaslach mit aller vnser sammvnge verjehen vnd tun chvnt an disem brief allen den di in sehent oder horent lesen daz der ersam ritter her Lvdweig der alt Grans dem got genade vns vnd vnser sammvnge hat gegebn ze rehtem selgeret des ersten ainen hof ze Rehpokingen dar nach drey hof ze Pollingen vnd ainen hof ze Wintpozzingen mit der beschaidenhait daz wir von dem hof ze Rehpokingen begen sullen alle jar seines vater vnd seiner vorfodern jartag an sant Georgen abent des nahtes mit der vigily vnd des morgens mit der selmess in der chapellen an der porten als sein hantfest sagt vnd von den andern oben genanten hofen sol man alle freytag geben der sammvng sehtzig pfenning Salzburger vmb vische Vnd daz des genanten hern Lvdw[eig] Grans guter will vnd andaht gentzlih volfurt wert sullen wir nah seiner svn pet hern Wernharts hern Perngers vnd hern Lvd[weigs] vnd alle vnser nachchomen swer denn abbt ist nah der altherren rat auz der sammunge einem herren di genanten hof mit ir gult enpfelhen der von dem gelt daz obn genant gescheft gar vnd gentzlich volfur Vnd sol auh der selb herr alle jar vns vnd der sammvnge daz selb gelt wider raytten zwir oder drey stunt vnd sullen di genanten Grens ob si wellent iren boten bei der raittung habn War aber daz der herr an dem gescheft sevmig wer oder daz er sein vor anderm des ordens geschefft niht gepflegen moht so sol swer denn abbt ist den selben nach der altherren rat verchern mit einem andern der es pezzer vnd mit fleizz volfur Es sol auh vnser vater der ersam abbt von Salmonswyler der vnser weiser ist alle jar in der weisunge mit ernst di sammunge vnd auh den pfleger fragen auf ir gewizzen vnd gehorsam ob daz genant gescheft wol volfurt sei vnd fund er kain sevmung dev in dem jar wer dar an geschehn so sol er daz selb alain swaz in dem jar versevmet ist hin haim seiner sammvnge bringen vnd an legen in aller der weis als es vns geschaffet ist vnd sol vns daz furbaz an drew jar an vnser gult vnd an vnserm rehten dehain schade sein Daz daz alles stet beleib sullen wir werben an disen brief vnsers vorgenanten vater vnd weiser des abbtes von Salmonswiler insigel zv sampt dem vnserm ze einem ewigen vrchunde Der brief ist gegebn do von Krystes geburt vergangen worn drevzehen hvndert jar dar nah in dem fumfvndzwaintzigsten jar an sant Marie Magdalen tag