Charter Document - 02520458

Ich Chunrad gehaissen der Apt purger ze Purchausen vnd mit mir mein hausfrawn frawn Vt verjech vnd tun chunt an disem brief allen den die in sehent oder hornt lesen das wir wedenchen vnd erchennen die gnade vnd trew die vns habent getan der ersam abbt Ilsunch ze Raitenhaslach vnd die sammung da selbs das ist das si vns habent lassen vnd verliechen ir haws ze Purchawsen vnd ain hub datz Vbrakchen dew da haisset Dornperch ze haben vnd ze niessen zu vnser baider leiben vnd nicht lenger Vnd ist das emalen geschechen vnd auch verschriben do von Christes gepurd vergangen waren drewzehen hundert jar vnd dar nach in dem zwaintzigistem jar an sand Veits tag Nw habent sie vns ze dem andern mal aber mer genaden vnd fuedrung getan vnd habent vns verliehen vnd lassen ain ander hub datz dem vorgenanten Vbrakchen dew haisset auf dem perig auch ze haben vnd ze niessen zu vnser baider leiben vnd nicht lenger auch habent si vns genomen in ir besunder bruderschaft Vnd dar vmb haben wir mit gutem bedachtem ainmutigen willen gegeben vnd geschaft dem oben genanten gotzhaws vnd der sammung ze Raitenhaslach durch got vnd durch vnser sel hail ze rechtem selgrat all vnser hab vnd das gut das vns beleibt vnd uber wirt an vnserm tod gemainchleich vnd gantzleich an alles geuar das si an beraitschaft an pett gewantt oder an anderm hausgerecht oder an gelt das man vns gelten sol oder schuldig wirt das sullen si alles sampt haben vnd in nemen nach vnserm tod ze selgrat vnd ze aigen Vnd sol das genant gotzhaws vnd die sammung in das alles stat vnd vnzebrochen beleiben geben wir in disen brief ze einem offen vrchunde an den nach vnser grossen pet vnd fleg der ersam man her Wolfger von Ramsstorff vitztumb bey der Rowt sein insigel hat geleit vnd her Fridreich pfarrer vnd techent ze Purchausen vnd ich Chunrad der Abbt das mein Der brief ist gegeben do von Christes gepurd vergangen waren drewzehen hundert jar dar nach in dem fumf vnd zwaintzigistem jar an vnser frawentag ze liechtmess