Charter Document - 02520456

Ich Seyfrid der Smid der ze Purchausen emalen burger bin gewesen vnd das gotzhaws ze Raitenhaslach mit aigenschaft angehor verjech offenbar an disem brief allen den die in sehent oder horent lesen das ich an meinen herren den abbt vnd an die sammung von Raitenhaslach geworfen han das si mir lassen habent die mul datz Aw ze pawmansrecht zu mein aines leib mit der beschaidenhait das ich in da von dienen vnd stewer sol als vorgewondleich ist gewesen Ich sol auch das purkrecht das ich ze Purchawsen han gehabt aufgeben vnd da von chomen allen weis vnd sol furbas meinen genanten herren vnenpfaren sein an all stet vnd auch dem gotzhaws Auch sol ich alle jar meinem herren dem abbt in sein stift pringen ain phunt pfenning vnd den brief den ich vber den gewerft von meinen genanten herren han das der gelesen werd ze ainem vrchunde War aber das ich die pundt oder ir ainen prache oder vberfur oder verworicht mit vnzuchten die merchleich waren so pin ich geuallen von allem dem rechten das mir auf der genanten mul verschriben ist vnd ist auch von mir ledig Des sind zeug her Vlreich der prior ze Raitenhaslach her Gebhart her Hilprant her Lionhart her Chunr[ad] her Hainreich munich da selb Hainreich der Landawer Chunrad der Sneider Chunrad der Landawer purger von Purchausen Hainreich der Trenn Hainreich von Tal Ditmar von Schonperg Vnd wann ich nicht han aigens insigels han ich mit grosser pet vnd fleg geworfen hern Wolfgers von Ramstorf des vitztumbs bey der Rowt insigel ze einem vrchund das an disem brief hanget Der brief ist gegeben do von Christes gepurdt waren tawsent jar drew hundert jar dar nach in dem vier vnd zwaintzigistem jar des nachsten tages nach sand Luceinn tag